Guwahati, May 21: Assam a·doko Sub-Inspector Junmoni Rabha-ni a·sel ong·e siani case-ko am·sandina gita Sonibar salo Assam sorkari, CBI-na pakwate on·angaha.
Assam a·dokni Director General of Police (DGP) GP Singh-ni parakatani gitade, manderang nangniktokahani gimin aro ia a·selko am·sandianio maming mikkang niteani gri ong·china gita ia case-ko Assam Police, CBI-na pakwate on·na tik ka·angaha.
Assam a·dokni Chief Minister Himanta Biswa Sarma-ba ia a·selni bidingo suk ong·gijaniko parakataha aro ia a·selko ning·tue am·sandina ku·rachakaniko on·ataha ineba Singh parakataha.
SI Junmoni Rabha-ni a·sel ong·e sianio badiaba police official-rang jak dongna nanggenchimode, uamangni kosako maming ka·sachakani gri ja·kurangko de·anggen ineba ua ku·rachakaniko on·ataha.
Assam DGP-ni parakatani gitade, Assam a·doko tol·gipa tangkarangko aro sonarangko tarianio jak donggipa manderangoni sak 70-na baten rim·ako man·aha aro iandakgipa kamrangko police-rang, sal 30-ni gisepon chu·gimik bon·atsrangna miksongenga.
Indake ong·engon, Junmoni Rabha-ni case-ko CBI jako ra·ani ja·man. Lakhimpur-ni SP Bedanta Madhab Rajkhowa aro Nagaon-ni SP Leena Doley-koba tol·gipa sonarangko badinggipa manderang baksa jak donga ine matnanganirangko man·ahani gimin ia officer sakgnikon gipin biapona kam ra·jitataha ine kobor on·aha.
