Shillong, Dec 5: An•tangni tangenga dipet aro rang•sitengkua dipet a•dokna aro a•dokni manderangna dangdike on•angkugen ine Meghalaya a•dokni Deputy Chief Minister Prestone Tynsong parakataha.
Adita salrangna skang, Hynniewtrep National Liberation Council (HNLC) bobil dolni ka•mikkenatgipa kattarangna aganchakaniko on•angengon, “Anga a•doko songdongenggipa mande saksa ong•e uamangni kattarangna dal•e ra•na nangjawa ine anga chanchia, maina uamang maini gimin angko ka•mikkenataha ukoba anga ma•sija ma uamang ka•mikkenatna nangani giminsa ka•mikkenataiahama ukoba anga ma•sija. Angni aganna nanganide iasan, angko Pynursla constituency-ni manderangsa seokaha aro a•doko songdongenggipa manderangni giminsa anga da•alo ia biapo ong•enga. Deputy CM ong•e angni dakna nanggni kamde a•dokna aro a•dokni manderangna kakketo dangdike on•anisa ong•a aro anga angni ra•sitengkua dipet a•dokna dangdike on•angkugen,” ine Tynsong parakataha.
‘Dosgri chadamberangko’ sorkari rim•angkugenchimode, a•dokni Deputy Chief Minister Prestone Tynsong aro a•dokni Home Minister Lahkmen Rymbui-ni nokdangko chadrapgen ine re•anggipa 2020 bilsini December 24 tariko HNLC bobil dol, ka•mikkenataniko on•angahachim ine nikna man•a.
HNLC bobil dolni asol manderangko rim•na man•jaengani gimin police department, dos gri chadamberangkosa rim•skaenga ineba HNLC matnangatahachim.
A•doko niam gri koela bikotna aro koela salna gita MDA sorkari, badiaba dolrang baksa nangrime kamko ka•enga ine matnanganirangna aganchakaniko on•angengon, HNLC bobil dolni matnanganirangna sakkiko mesokna man•genchimode ua an•tangni deputy chief minister ong•aniko kam watgen ine Tynsong parakataha.
“Batanggimin changrangoba anga iani bidingo talataniko on•manaha aro da•oba iandake matnanganirangna sakkiko on•na man•genchimode anga da•on deputy CM-ni kamko watna man•aigen,” ine Tynsong parakataha.
Tom•tomaniona re•bapilna gita agangrikna skaniko parakengon, gisiko nanganiko mesokchina gitaba ua, HNLC bobil dolko didiataha.
“Chinga uamangni agangrikna skaniko parakanina kusi ong•a indiba HNLC bobil dolko champengatgipade a•dok sorkari ong•ja indiba ma•mong sorkarisa. Bobil dol baksa agangrikaniara chingni bilo ong•genchimode chinga da•ode agangrikaniko a•bachengmanenggnokchim,” ine Deouty Chief Minister aganaha.
Iani bidingo a•dok sorkari, ma•mong sorkarina report-ko on•atmanaha ineba Tynsong parakataha.
