Gangtok, Oct 10: Salgro-salaramo mikka jime waanganichi ianpak namjabate chi-bananganio Sikkim-ni Lachen-o jachange dongrikgipa tourist-rang, Indian Army-ni naljoka biapona uamangko rimongkatbaani ja·man an·tangtangna ong·a obostarangko parakangtokaha.
Sikkim a·dokni salgrochipak donggipa Lachen-o biaprangni dingtangmancha nitoanirangko nina gita India-ni dingtang dingtang a·dokrangchini re·bagiparang bilsiantin gapronga, uandake ianpakoba bang·a tourist-rang biap nina re·baeming tanggitik mikka wae chi-bananichi Lachen-o jachange dongna gita nangtokahachim.
“Mumbai-oni re·bagipa tourist, ia ong·a obostani gimin aganangengon, chinga Sikkim-ona chingni dedrang baksa gimik sakdok re·baachim, indiba mikkarang jime waeming chibima rang·san dal·baani a·sel chinga Lachen-on jachangtokaha, indiba Indian Army chingni duko ga·akengmiting somoi chachao re·bae pilak nanganirangko on·e dakchakaha, iana chinga uamangko dingtangmancha mittela ine parakataha.
Mangan a·jani Sikkim Government College-o poraienggipa chatro-chatrirangba tanggitik mikka jimprete wae a·sel-obosta ong·ani somoio Lashar Valley-ona batanggimin September 30 tarikoni exposure trip-na re·chakatangtokeming sak 16 chatrorangko man·chape saksa professor-ba Lachen-oni re·jitna man·gija jachange dongna nangtokahachim.
Ia exposure trip-o bak ong·pagipa chatro, Rigden Bhutia, unomiting kobor ra·timgiparangna aganangengon, “a·bachengode, anga banggria gitasa daknikaiaha, indiba saoba angona re·bae chingna minit 15 somoisanjok ine aganeaha, aro maiamancha ong·a uko chinga ma·sijaha, maina skulni gitasa chinga exposure trip-na re·baachim aro salgnide salba namachim, indiba gittamgipa salosa ia obosta ong·chengeming chinga gimikan biaptangon jachangtokaha. Ia chingni neng·nikani somoio chingna cha·a-ringaniko on·e dakchakaha, una agre maming neng·nikaniko chinga chagronga dongja ine ua agan-talataha.
Luchen-Mangan-ni MLA, Samdup Lepcha, rang·gitik obosta ong·anichi rama-jal·langrang nosto ong·tokeming Lachen-o da·o obostarang namen nambrea ong·jaenga, indiba Sikkim sorkari, Lachen-o jachanggipa bang·a tourist-rangkon naljoka biapona rimongkatbaaha ine aganenba, jachanggipa manderangna Indian Army, ITBP, NDRF gimikan dakchakanirangko on·enga ineba ua agandapataha.
Indake ong·engon, Sikkim a·doko mikka jimeming dal·a a·sel ong·anichi da·odipet sak 70 baten manderang siangaha aro sak 100 mang manderangko da·oba nikchipkujaenga.
