Tura, March 21: A·dokni sima-arirango donge nitimenggipa Meghalaya Border Security Force (BSF)-ni 43 Battalion, uamangni Officiating Commandant, 2IC (Second-in-Command), L Roshan Kumar-ni dongpaanio South Garo Hills a·jani Phanda songo Civic Action programme baksana Medical camp-ko ong·atangaha.
Ia programo, Baghmara, Bhawanipur, Phanda aro Rongra songrangoni manderang re·bae bakko ra·angtokaha aro South Garo Hills-ni sima jol wilwilao songdongenggipa songni manderangna, dingtang dingtang bosturang jekai, football aro volleyball kal·ani bosturangko, tinrangko, chi rongdikrang, pipe-rang, computer-rang, tabil aro benchrangko suale on·angjolaha.
Apsan programni bak gita Phanda songo free medical camp-ko ong·atanggipaoba sak 150 mangni gita songni manderang bakko ra·angtokaha jeon, AC (CMO)-ni Dr Bhajan Lal baksana PHC Rongra-ni Dr Rikrimchi R Marak aro Dr Shah Alam Hussain-maang pilak sagiparangko niangenba uamangna samrangkoba indin suale on·angaha.
Uasan ong·aigija, sima jol songrangoni pilak me·a-me·chik chadamberangna Butbar saloni a·bachenge robol ga·tingsusaanikoba ong·atnasienga jeon, gimik dol-dok bakko ra·e susagrikanggen.
Indake ong·engon, a·jani sima jol songrango songdongenggipa manderang iandakgipa programko ong·atanina kusi ong·aniko parakangtokan baksa, mikkangchiba apsandakgipa programme-rangko ong·atangkuchina BSF-ko mol·molangaha.
