Shillong, Dec 15: Assam aro Meghalaya a•dok damgnini simarango meligrikna man•jaenggipa biaprangni bidingo KHADC-ni gita sandie tarigimin report-ko Budbar salo, KHADC-ni Chief Executive Membor Titosstarwell Chyne, Meghalaya a•dokni Chief Minister Conrad K Sangma-ko Secretariat-o grongenba on•angjolaha.
KHADC-ni report-ko on•eani ja•mano kobor ra•timgipa manderang baksa agangrikengon, ia nangchongmotgipa kamni bidingo tom•e agan-chanchirimna gita cholko on•aha ine KHADC-ni CEM, a•dokni Chief Minister-ko mittelpilangaha.
Ia report-ko KHADC-ni boundary committee tariaha aro ia report-o uamang, KHADC-ni a•jao ga•akgipa pilak simarango songdongenggipa manderangni nangnikanirangko, Himarangni salgimin wa•rengrangko aro gipin nangchongmotgipa kamrangni gimin janapaha ineba Chyne parakataha.
