Shillong, Dec 15: Assam aro Meghalaya a•dok damgnini simarango meligrikgijanirangko namatna gita sorkari ja•ku de•chakatengon, dingtang dingtang dolrangni agan-ku•pattianirangko ra•e sorkari name nichenggen aro ja•mano Assam-ni chief minister-ko gronge agangrikna skang Meghalaya a•dokni chief minister-naba ia ku•pattianirangko ra•ange chanchirimgen ine Budbar salo, Meghalaya a•dokni Deputy Chief Minister Prestone Tynsong parakataha.
Deputy CM-ni parakatani gitade, Budbar salo Meghalaya a•dokni Chief Minister, KHADC, JHADC, songo noko jatko dilenggiparang, dingtang dingtang NGO-rang aro political dolrang baksa tom•e uamangni sorkariona ra•bagipa ku•pattianirangko apsan nipilangaha.
Dingtang dingtang dolrangni ra•bagipa ku•pattiani aro chanchianirangko sorkari ra•chakaha aro da•o a•dok damgnini simarango meligrikgijanirangko namatna gita kamrangko ka•angkugen ineba Tynsong parakataha.
Deputy CM-ni parakatani gitade, KHADC aro dingtang dingtang dolrangni sandie man•gipa lekkarang, a•ani lekkarang aro chengoni songdongbagiparangni see rakkianirango pangchakesa ja•kuko de•china gita dingtang dingtang dolrang, sorkarina ku•pattianiko on•aha aro uandaken ja•mano a•dok damgnini chief minister-rang apsan asonge iarangni gimin chanchirimanggen.
