Shillong, July 5: Adhoc skigiparangni dormahako bariatchina aro adhoc skulrangko deficit-ni gadangona ra•dochina dabie antigimik jingjengatanirangko dakangani ja•man skigiparangni jingjengataniko Federation of All School Teachers of Meghalaya (FASTOM), Mongolbar salo ra•galatpilaha.
FASTOM-ni ku•wattimgipa Mayborn Lyngdoh-ni parakatani gitade, Mongolbar pringo FASTOM-ni central executive committee (CEC) tom•enba, adhoc skigiparangni dormahako bariatna gita sorkarini tik ka•ani bidingo chanchirimangaha. Ia tom•anio FASTOM-ni dilgiparang, sorkarini bariatgipa dormahana suk ong•gijaniko paraktokaha indiba maming chol dongjae skigiparangni jingjengataniko dontongchengna tik ka•angaha ine Lyngdoh parakataha.
Ad hoc skigiparangni dormahako bilsio 5 percent ka•e bariatchina dabienggipani bidingo FASTOM-ni dilgiparang, sorkariko gisik ra•attaiangkugen ineba Lyngdoh parakataha.
Dormaharangko bariatahani gimin chu•ongnikani gnang noktangtangchi re•angpilchina skigiparangko didiatengon, je man•giminko chu•ongnikjagenchimode mikkangchi skigiparangna namjabatgipa obostarang sokbaskanaba gnang ine FASTOM-ni ku•wattimgipa parakataha.
Skigiparangko re•angpile chatro chatrirangna skie on•epilchina didiatengon, mikkangchi Meghalaya a•dokko lekka porani mongsonggipa biap ong•atna gita FASTOM ja•kuko de•angkugen ine Lyngdoh parakataha.
Meghalaya a•doko skigiparangko bakgittam dake, chong•motan government, government aided aro private teacher dakesa donchina sorkariko didianggen ineba Lyngdoh parakataha.
