Shillong, Oct 06: Meghalaya Government Lower Primary School Contractual Teachers’ Association (MGLPSCTA), jasana skang uamangni man·na nanganirangko a·dok sorkario jinma dabie jingjengatangani ja·man, nokdangni manderangko rimbite Bristibar salo Shillong-ni Main Secretariat Building ning·achi napdrana am·tokani a·sel golmalrang dal·en ong·gitikaha.

Ua biapo, Section 144 Code of Criminal Procedure, 1973-ni niamko ra·gatatahaoba, skulo skigiparang man·adipet Secretariat office ning·achi napdrana gita drapdrap daktokskaahachim.

Indake ong·engon, skigiparang baksana me·chikrang aro bi·sarang biapo donggenchimoba, manderangko katpipraatna gita chelchakgipa dolrang mikchi ong·atgipa gas (tear gas)rangko jakkalna draatako man·aha.

Mingsa aiao inmananiara, tanggitik golmalrang ong·e obostarang ong·gniko nirokna gita ua biapo me·asa police-rangna agrede me·chik police saksa mangba dongskajachim.

Pringchibara obosata ong·ani ja·man, State Commission for Protection of Child Rights-ni chairperson, police-rangni tear gas goanichi saknaa man·gipa me·chik skigiparang aro bi·sarangni agan-talate on·anikoba knatime ra·angaha.

Ia mamlani bidingo mikkanggrike golpona gita jingjengatgipa dolko attam 5 bajio Chief secretary okamahachim, indiba uamang sorkari official-rangko grongna jechake jingjengataniko dakangkuaiaha ine Magistrate, koborna parakataha.