Bajendoba, April 3: Ia jani gisepo ong·nasienggipa GHADC eleksinna Sonibar salo campaign-ko ka·anganio, a·dokni skotong minister Pa Conrad K. Sangma, da·o sasono ong·enggipa dolni a·dokna pilak namroro-silroroatani kamrangko chu·sokate on·aniko agan-janape a·jani manderangni chu·gimik chakpaaniko am·angaha.
North Garo Hills a·jani Bolsong GHADC constituency-ni ning·ogipa Rangagora-o eleksinna tom·aniko ong·atgipao, rama-jal·ang, lekka-pora aro sana-banani a·barango NPP dol bang·a dingtang dingtang namroro-silroroatani kamrangko a·bachengate on·na man·aha ine tom·bagiparangna aganprakaha.
“A·dokna chinga namgipa rama-jal·angrangko tarie on·na aro skia-pora aro sana-bananio mongsong nangchongmotgiparangko namdapate on·na gita chu·gimik on·kangenga. Chingni sorkari, a·dokni manderangna dingtanganiko ra·bana gita kamrangko ka·enga. Meghalaya a·dokko dingtangatna gita chingni on·kange kam ka·aniko a·bachengataha aro re·baenggipa bilsi-gnirango a·dokni manderangni janggi tanganiko namdapatna gita bang·a kamrangkon a·bachengate on·angkugen ineba Pa Sangma aganaha.
Garo Hills-ni galchipgimin rama-sorokrang aro dolongrangko man·chape A·chik a·songni pilak biaprangona nadike tarigipa rama-jal·angrangko namdapatna gita batanggimin bilsi-gittamni gisepo gong kror 2000 mang tangka-paisarangko jakkalaha ine skotong minister u·iatkuaha.
“Warachakgipa dolrangde re·bae ong·gijagipa kattarangko gipatna jotton ka·aigen, indiba bil aro sasonko jako ra·enggipa sorkarini maidakgipa namdapatani kamrangko dake-ka·e on·ahachim uarang pilakkon mikrontangchin nikenga, uni gimin uamangni kattana nachil songjana aro ku·cholsan ong·e NPP dolna vote-rangko on·tokna,” ine skotong minister a·jani manderangko didiangaha.
Batanggimin sal 12 rango Pa Conrad Sangma, Garo Hills-ni dam 20 dingtang dingtang constituency-rango sokbaenggipa eleksinna campaign-ko ka·angaha aro chang 50 na baten eleksinna tom·anirangoba jinmana aganprakangaha.
