Shillong, Jan 6: Meghalaya a•doko COVID-19 man•giparang batrorobataiengahani gimin skulrangna chutti wataniko a•dok sorkari, re•baenggipa January 24 tarikona ra•dodapatna tik ka•angaha.
Iani bidingo kobor ra•timgiparangna talataniko on•angengon, skulrangna sin•karini chutti on•ani January 10 tarikon bon•ani ong•engahachim indiba da•o chuttiko January 24 tarikona ra•dodapataha ine Meghalaya a•dokni Education Minister Lahkmen Rymbui parakataha.
Skulrang, Krismasna skangan chuttiko man•na a•bachengahachim.
A•doko COVID man•giparang batrorobataiengani gimin sorkari, skul aro college-rangko chipchina ge•ettaigenma ine sing•on, iani bidingo Education department, u•iataniko on•manaha aro nangani kri skulni managing committee-rang, district administration baksa nangrime ja•kuko de•anggen ine Rymbui parakataha.
Chatro chatrirangko naljoke rakkina gita sorkari mai ja•kurangko de•samsoenga ine sing•on, “Chinga jeko dakna manchisogenchimoba COVID pangnan chingna skang re•soronga aro iandakgipa obostaode an•ching an•tangtangna agre darangba dakchakaniko on•na man•jawa,” ine Education Minister aganchakaha.
Chatro chatrirangni gisepo bilsi 15-oni bilsi 18 ong•gipa chadamberangan mongsongbatgiparang ong•a ine janapatengon, tika su•e ra•china gita ua chatro chatrirangko aro ma•a paarangkoba didiataha.
