Shillong, Mar 17: Meghalaya a•doko ra•gate ka•enggipa smart metering project-ni bidingo dingtang inquiry-ko dakchina gita Bristibar salo, Opposition AITC dolni dilgipa Mukul Sangma, a•dok sorkario dabiangaha.
Ia project-ni bidingo dingtang inquiry-ko dakchina dabiangengon, a•dok sorkarini u•iatgipa Independent Inquiry Committee-ni gita ia project-ni bidingo talatanirang rongtalbrejani gimin ia smart metering project-ni gimin dingtang inquiry dakaniko nangnikenga ine Sangma parakataha.
Meghalaya Energy Corporation Limited (MeECL)-ni bidingo ma•sie ra•na gita pilak kamrangni giminan ia Independent Inquiry Committee am•sandianirangko daken ine sorkarini ku•rachakaniko on•ahani giminba ua an•tangni mittelpilaniko parakangaha.
Sangma-ni dabianina aganchakaniko on•angskaengon, ia Independent Inquiry Commission-ni gita MeECL-o ong•gija dakanirangko am•sandiani report-ko March 31 tarikna skangan a•dok sorkarina on•na sienga ine a•dokni Deputy Chief Minister aro Power Minister Prestone Tynsong parakatskaenba, ia report-na chakchike sengkuchina gita Sangma-ko didiangaha.
Opposition dolni Chief Whip George B Lyngdoh-ni sing•anina aganchakaniko on•angskaengon, MeECL-ni bidingo inquiry-ko dakchina ge•etaniko on•ahaon ia inquiry-ni report-ko man•kujaskal tangka paisa gamanikoba dontongchengna sorkari tik ka•aha ine Tynsong parakataha.
Power Minister-ni parakatani gitade, 2010 April 1 tarikoni 2021 March 31 tarikona MeECL-ni dingtang dingtang kamrangni bidingo am•sandina gita sorkari, Independent Inquiry Committee-ko songaha.
Inquiry-ko dakanio Allahabad High Court-ni gitcham Justice RN Mishra-na gitcham IAS officer Manoj Kumar, Administrative Member ong•e aro gitcham REC Executive Director Sunil Kumar, Technical Member ong•e dakchake on•engachim.
