Shillong, May 23: Meghalaya a•doko smart metre-rangko chate on•na skang, iani bidingo a•dokni manderangna talate on•chengchina gita mol•mole, Sombar salo Federation of Khasi Jaintia & Garo People (FKJGP)-ni dilgiparang, a•dokni Power Minister Prestone Tynsong-na memorandum-ko on•angaha.

Memorandum-ko on•angani ja•man FKJGP-ni working president Dundee C Khongsit, kobor ra•timgiparang baksa agangrikengon, department-ni kamko FKJGP jegalenga ong•ja indiba a•doko smart metre-rangara gitalgipa ostrorangsa ong•engani gimin bang•bata manderangan ia kolni kam ka•ani bewalrangko ma•sitokkujaenga aro ia smart metre-ko manderangni nokrango chate on•na skang, iani bidingo a•dokni manderangna talate on•chengna man•ode nambatgen ine parakataha.

Smart metre-rangko skanggipa sorkarini nokrang, jekai office quarter, karkana aro uandakgipa nokrango chatchengchina aro ia sorkari nokrango chu•sokgipa ong•genchimosa a•doko songdongenggipa manderangni nokrangoba chatchina gita Power Minister-na ku•pattianiko on•baaha ineba Khongsit parakataha.

Indake ong•engon, FKJGP-ni ku•pattianirangko sorkari ra•chakna aro nanga gita ja•kurangko de•na Power Minister ku•rachakaniko on•ataha ineba FKJGP-ni working president parakataha.