Tura, Oct 9: Jharkhand-o Naxalite bobil dolni jakchi so·ota man·e sianggipa CRPF-ni saksa sipaini bimingchi North Garo Hills-o dongipa ramako biming mingenga ingipako A’chik Holistic Awakening Movement (AHAM) dol raken jegalataha.
Sianggipa sipaiko mande ra·ani gita ramako biming dongenggipara North Garo Hills a·jani Deputy Commissioner, Pa RP Marak ong·a ine AHAM koborna seachi janapataha.
Jharkhand a·doko bobil dolni jakchi so·ota man·e sianggipa sipaiko mande ra·anikode uamangba namnikpaa ine janapatengon, indake ong·genchimoba, AHAM dolni nangnikaniara a·jani DC a·songna aro jatna janggitangko on·chake sianggiparangni bimingchi ramarangko mingna nangnikmanchaa ong·ode A·chik jatni matgrik gitchamrang jekai Pa Sonaram R Sangma, Pa Togan Nengminja aro Capt. Williamson A. Sangma aro A·chik jatoni sianggipa gipinrangni bimingrangchisa ua mingna nangachim ine janapataha.
Unbaksana, Garo Hills-oni rama dilsako biming donna skangba a·jani DC, A·chik NGO-rang, North Garo Hills-ni joltangoni manderang, A·chik jatoni seng·gipa-matgipa dilgiparangni pilak agan-ku·pattianirangko ra·angchengna nangachim ineba uamang chanchiatangko parakataha.
“British-ni sason ka·aoniko man·rikrikbaani a·selan Garo Hills-ni ning·o A·chikni bimingrangchi minggijagipa biaprang bang·en dongahani gimino A·chik a·songni ning·o donggipa ramarang, gittimrang aro songrangko biming chong·motchi mingjitna ian namchachagipa somoi ong·engaha,” ine AHAM-ni Central Executive Body-ni Chief Organising Secretary, Cherian G Momin, Sonibar salo koborna seachi parakataha.
