Shillong, May 10: East Khasi Hills a·jani Sohiong Assembly constituency election-na sikdepe pu·onaniko Budbar pring 7:00 bajioni a·bachengataha aro pu·onaniko attam 4:00 bajiona ong·atengon, pring 11:00 bajiona kingkingde pu·onani 43.6 percent gapaha.
Sohiong constituency-ni gital MLA-ko seokna gita ia constituency-ni ning·o donggipa dam 63 polling station-rango gimik sak 34,783 manderang pu·onenga aro ia sak 34,783-oni sak 17,096-de me·asarang aro sak 17,687-de me·chikrang ong·a.
Meghalaya Assembly-ni gipin dam 59 constituency-rangode re·anggipa February 27 tarikon election-ko ong·atahaoba, Meghalaya a·dokni gitcham home minister aro Sohiong constituency-o UDP-ni candidate ong·e susanagipa HDR Lyngdoh sagi, February-ni 20 tariko siangahani gimin Sohiong Assembly constituency-ni election-kode ra·doatna nangao ga·akskaahachim.
Sohiong election-ko nama bewalo aro tom·tomao ong·atna man·na gita ma·mongoni dolbonga central armed police force (CAPF)-rangko donataha aro ia changode skanggipa changna me·chikrangni flying squad-koba donatahachim.
Ia Sohiong Assembly election-o me·chikrangni polling station aro chadamberangchi chalaigipa polling station-rangkoba donataha.
Sohiong Assembly election-o mongsonggipa ong·e susagrikenggipa candidate-rangara, National People’s Party (NPP)-ni Samlin Malngiang aro United Democratic Party (UDP)-ni Synshar Kupar Roy Lyngdoh ong·engachim.
Ia Sohiong Assembly election-ni result-ko re·baenggipa May 13 tariko parakgen.
