Shillong, Aug 4: Ma•mong aro Meghalaya sorkari baksa tom•tomanina agangrikanio, Hynniewtrep National Liberation Council (HNLC) bobil dolni dilgiparangna naljokaniko on•na gita Meghalaya a•dokni Chief Minister Conrad K Sangma, ku•rachakaniko on•angaha.

Iani bidingo, Shillong songjinmao donggipa NPP office-o kobor ra•timgipa manderang baksa agangrikengon, sorkari baksa agangrikna re•baenggipa bobil dolni mande sakantinan naljokaniko on•aniara sorkarini daitoan ong•a ine Chief Minister parakataha.

HNLC bobil dolni manderang an•tangtangna naljokaniko on•ani bidingo jajrengchakaniko parakaha ine janapatengon, bobil dolko tom•tomaona rimbapilna gita kamrangko ka•chakatahani a•sel da•o HNLC bobil dol baksa agangrikna cholko man•engaha aro bakan bobil dol baksa agangrikaniko a•bachengatna ka•dongenga ine Chief Minister parakataha.