Shillong, Feb 9: Champengatako man•gipa Hynniewtrep National Liberation Council (HNLC) bobil dolni sorkari baksa agangrikna kusi ong•engani gimin Meghalaya sorkariba kusi ong•aniko parakataha aro iani bidingo sorkarina seachi u•iatchina gita HNLC bobil dolko didiatskaaha.

Budbar salo, a•dokni Deputy Chief Minister, Home Minister aro dal•dalgipa official-rang baksa tom•e chanchirimangani ja•man kobor ra•timgiparangna u•iatengon, HNLC bobil dolni agangrikna on•enganiko sorkari ra•chakenga indiba uamang sorkarina seachi u•iatskana nanggnok ine Meghalaya a•dokni Chief Minister Conrad K Sangma parakataha.

HNLC bobil dolni nangnikenga gitan sorkari, ku•baltitimgipako sandina a•bachengengaha aro ia kamna bang•a manderangni bimingrangkon sorkari sandie donahaoba da•o dipet bimingrangko parakatna man•kujawa ineba Chief Minister parakataha.