Shillong, Feb 10: Sorkari baksa agangrikna nangnike Hynniewtrep National Liberation Council (HNLC) bobil dolni seatgipa chittiko sorkari man•soaha ine Bristibar salo, Meghalaya a•dokni Home Minister Lahkmen Rymbui parakataha.
Iani bidingo a•dok sorkari ta•raken India sorkarina u•iatskagnok aro HNLC bobil dol baksa agangrikna gita ta•raken ku•baltitimgipako sorkari seokgnok ineba Home Minister parakataha.
Sorkari baksa agangrikna tarianiko HNLC bobil dolni parakatani ja•man, sorkari baksa agangrikna nangnikaniko see u•iatchina gita Budbar salosan a•dokni Chief Minister Conrad K Sangma, HNLC dolko didiatahachim.
Uandaken, HNLC bobil dolni dilgiparang, Bristibar salo a•dokni Chief Minister-na chittiko seataha aro iani copy-ko a•dokni Home Minister-naba on•ataha.
