Shillong, March 9: Sorkari chakkrirangna 30 percent arrear-rangko on·na nangkuenggipa bangkioni bakbrini baksako on·angaha ine a·dokni skotong minister Pa Conrad Sangma, Mongolbar salo house-o tom·anio u·iatangaha.
A·doko tangka-paisarang dongani kri da·oni financial bilsio bangki 22.5 percent arrear-rangkoba man·adipet on·angna jotton ka·gen ineba ua u·iatkuaha.
“Gimik-gimang arrear-rangoni 7.5 mangni gita ong·gipa 30 percent arrear-rangoni bakbrini baksako mija February 11 tariko a·dok sorkari on·angaha” ine Pa Sangma u·iataha.
Warachakgipa dolni Chief Whip, Pa PT Sawkmie-ni sing·anina aganchakengon, a·doko da·omiting tangka-paisao namen neng·nikaniko chagronggenchimoba a·dok sorkari tangka-paisako amadipet simsakatachi tikatna jotton ka·enga ine skotong minister aganchakaha.
Chu·gimik arrear-rangoni 7.5 percent-mangko sorkarini on·anggipako sorkari chakkrirang ra·chakama ba ra·chaktokjaenggenma ine Pa Sawkmie-ni house-o sing·angkuon, chu·gimik on·na nanggipa arrear-rangko matchote on·na gita ian a·dok sorkari kam ong·a aro ian changgittam dake on·angachi uamangni chu·gimik arrear—rangko matchote on·ani gitan ong·enga ine skotong minister agan-talataha.
“Iani giminan kam ka·giparang baksa Chief Secretary gronge agangrikangaha aro a·doko tangka-paisana neng·nikaniko man·enganirangko uamangba ma·sia. Indake ong·genchimoba, man·adipet bangki arrear-rangkoba uamangna chu·gimikkon matchote on·nangna ian sorkarini daitoba ong·a,” ine ua agandapaha.
Tangka-paisa chu·onggijani gimin aganengon, ma·mongni kajinarangko chamatgipa tangkara gong kror 6,490 mang ong·achim, indiba a·dok sorkarini man·somanchaade gong kror 4,698 mangsan ong·aiaha jean gong kror 1,792 mangni gita komiachim ineba skotong minister talatkuaha.
“A·doktango man·gnigipa kajinana chamgipara gong kror 2,377 mang ong·achim indiba man·a manchade gong 1,859 mangni gitasan ong·aiaha jean gong kror 518-mangni gita komia,” ineba Pa Sangma agandapataha.
