Shillong, Jan 30: Giprorogipa sabisini manderango sanapani da·o Meghalaya a·doko komiangahani gimin, sajinmana dingtangmancha niam rake dongiminrangko ol·grokdapani gimin nigrike kamrangko ka·china gita sorkari, mijal Sukrobar salo Chief Secretary-ko aganaha.
Sajinmani bidingo nipiltaianiko dakna, skotong minister Pa Conrad Sangma-chi mijal tom·aniko dakdilangani ja·man koborni manderangna agan-talate on·anganio, a·dokni manderangni namgnina somai gita niamchi rake beng·e dongiminrangko mikkangchi aditan ol·grokdapatani gimin nigrike kamrangko ka·taichina gita chinga, a·dokni Chief Secretary-ko aganmanaha ine dakchakgipa skotong minister Pa Prestone Tynsong aganaha.
Indake ong·engon, a·dokni je biaprangon niamko ol·grokanirangko nangengachim iani gimin sorkari changsatai mikkang antio asonge chanchirimtaigen.
Namjabegipa sajinmana tika su·anirangko a·doko a·bachengata baksana sabisiko man·giparang aditan tang·ongangahani gisepo, da·o a·dokni obostarangko nigrikani ja·man chanchianirang aro agan-ku·pattianirang baksa re·bachina gita Chief Secretary-ko aganaha ine dakchakgipa skotong minister agan-talataha.
“Iani gimin pilak kamrangko ka·na chu·gimik bilkon chief secretary-na pakwatmanaha aro ua an·tangan name golporime, agan-ku·pattianirangko ra·ani ja·manosa re·bapilna nanggen jeni ja·man chinga asongrimtaie tik ka·aniko dakanggen,” ineba Pa Tynsong taldapataha.
COVID-na porikka ka·atanirang a·doko komiangkuja ine jera-ra·e aganengon, mija bilsi December ja mangmangon chinga hajal sotbonga batpile porikka ka·ataha aro ia ja mangmangan hajal kolatchi-bongana baten ka·ataha jerangchin a·doko sajinmana porikka ka·atani kamrang komikujaenga ine nikna man·a aro haida ja·manchide an·chingni a·dok namjabegipa sajinma gri ong·naba dongjok ineba Pa Tynsong agandapaha.
Namjabegipa sajinmako man·gipa a·doko da·o sak 83 mangsan dongaiahanichi sajinmani aditan komiangengahani gimin jasani ja·manosa a·dok sorkari mijal Sukrobar salo sabisini bidingo nipiltaianiko dakna tom·aniko ong·atangaha.
“Sabisiko man·ani gimin aganode, an·chingni a·doko namen namdapaniko nikna man·aha aro anga ka·donga ru·utgijan an·chingo sagipa saksaba dongjanaba dongjok, jekon aganode COVID 19-oni jakgitel ong·gnok ine chinga ka·dongsoenga,” ine Pa Tynsong parakataha.
Indake ong·oba, a·dok gipinoni napbaenggiparangnade niam dongiminrangko ja·rikangkuenga aro sajinmana porikka ka·atani ja·manosa uamang napbana cholko man·gen aro Assam-oni jemangan porikka ka·ani certificate-rangko ra·e re·bagen uamangkode chinga a·dokona napbana cholrangko on·enga ine Pa Tynsong talataha.
