Shillong, Jan 30: Mija January 23 tariko Union Home Minister Pa Amit Shah-ni a·dokona wenbamiting somaio a·dokni cabinet aro ILP-ko dabienggipa dolrangni memorandum-rangko ong·angao uamangni mol·molanirang baksa uko a·songni skotong songjinma Delhi-o grongna agangimin dongani gimino, da·o Union Home minister-ko grongna gita uni choljoka somaiko sengna nangao ga·akengaha, maina mijal Sukrobar saloni intal Parliament-o Budget Session ba asongna tangka-paisa chamani bidingo tom·bimonganiba a·bachengaha.
Parliament-o tom·aniko mijal January 29 tarikoni re·baenggipa April jani 8 tarikona kingking ong·atengon, ia tom·aniko February 15 tarikoni March 7 tarikonade neng·takna somaiko donskaaha. Indake, a·songni finance minister Ma Nirmala Sitharaman-chi a·songna tangka-paisa chamanirangko Parliament-ona ra·baienga.
Union Home Minister-ni somai choljokako chinga sengenga aro skotong minister an·tangan Home minister-ni office-oniko kobor ra·rokrokatenga, indiba da·odipet chinga uko grongna okamataniko man·sokuja indiba re·baenggipa salrango uko grongna man·telgen ine anga ka·donga, ine dakchakgipa skotong minister Pa Prestone Tynsong, mijalo kobor see-parakgiparangna Shillong-o aganaha.
Budget-ni gimin tom·ani re·baenggipa April jani 8 tarikona kingkingan ong·gen ine talatengon, a·songna tangka-paisa chamani bidingo parliament-o tom·bimongani da·aloni a·bachengaha, uni gimin mikkang antio ong·jaoba mikkang anti changsarangode mande ra·ako man·na kragipa Union Home Minister somairangko choljokatenba an·tangko grongna gita chinga cholrangko on·telgen ine anga ka·donga aro apsandaken, ia budget-na tom·ani somaion uko grongna cholko man·gen ine a·dok sorkariba ka·dongsoenga ine dakchakgipa skotong minister mijalo aganaha.
Unomiting, ILP-ko a·doko ra·gate on·china dabienggipa dolrangni gimin sing·on, a·dokona mija wenbao HM an·tangan uamangko Delhi-o gronggen ine aganangaha aro iako uamangba u·ia, ine ua aganchakaha.
Indake ong·engon, niam gri napdrabaanirangko champengsona gita Meghalaya a·doko Inner Line Permit (ILP)ko ra·gatani bidingo Union Home minister Pa Amit Shah baksa agan-golpogrikanko dakna, ILP-ko dabienggipa dolrangko dikdiksa sengkuchina gita dakchakgipa skotong minister mol·molaha.
Janapjolna gita, ILP-ko a·doko nangnike dabienggipa a·dokni dingtang dingtang dolrang ia nangchongmotgipa mamilani bidingo chanchirimaniko dakna Pa Amit Shah-ni jechakangani gimin suk ong·gijaniko paraktokaha aro mitamrangde iako a·dokni manderangko aro MDA sorkariko kal·stape roenga ineba matnangangtokaha.
