Baghmara, June 9: South Garo Hills a·jao rikenggipa dingtang dingtang sorkari nokrang aro rama jal·langrangko Bristibar salo, Baghmara-ni MLA Kartush R Marak, South Garo Hills a·jani officer-rang baksa niangaha.
Bristibar salo, Marak-ni nianggipa dingtang dingtang sorkari project-rangara, Police Welfare Project, Captain Williamson Memorial Government College, Baghmara Civil Hospital, PWD ramarang, PHE department-ni project-rang, Water Resources-ni project-rang aro gipin project-rang ong·achim.
Captain Williamson Memorial College building-ko niangon, ia building-ko rikanio, pakmarangni bretani aro mitam classroom-rango kelkirang namgijako nike ua suk ong·gijaniko parakaha aro iani bidingo South Garo Hills a·jani Deputy Commissioner baksa agangrikna manchie donangaha.
Police Reserve-o rikenggipa building-ko nianganioba ua namgijagipa itarangkosa jakkalenga ine an·tangni suk ong·gijaniko parakangaha.
Jongkol-oni Dabram-ona tariangenggipa PWD ramako niangon, ia ramao culvert damsako a·a nokgipa tarina on·jaenga ine ma·sina man·ahani gimin ua an·tangan a·a nokgipa baksa agangrikna tik ka·angaha.
Dabram-o check dam-ko rikanioba bostu namgijako jakkalenga ine Baghmara-ni MLA suk ong·gijaniko parakangenba, ia pilak kamrangkon manderangni namgnina name chu·sokate on·china, sorkari officer-rangko aro contractor-rangko didiangaha.
