Tura, Feb 15: South Garo Hills a•jako ru•utbea bilsirangna gitcham sorkarirang galchipahaoba, National People’s Party (NPP)-ni dilanichi sorkariko rikchenga intalan South Garo Hills a•jao namroro silroroaniko ra•bana gita rakbee kamrangko ka•dilahani gimin Meghalaya a•dokni Chief Minister aro NPP-ni national president Conrad K Sangma-ko 58-Rongara-Siju constituency-ni MLA aro NPP candidate Rakkam A Sangma mittelpilangaha.
Mongolbar salo, Rongara-Siju constituency-ni ning•o donggipa Rongara songo NPP-ni tom•bimonganiko ong•atanio Rakkam, Conrad-ko mittelpilangaha.
South Garo Hills a•jao ta•rakbate namroro silroroaniko ra•bana man•na gita ia changoba uko seokpiltaichina gita ua, Rongara-Siju constituency-ni manderangko didiangaha.
Rongara-oni Ranikor-ona rama tarienggipani bidingo aro NPP sorkarini a•bachengatgipa gipin kamrangni giminba ia tom•anio Rakkam, manderangna gisik ra•atpilaniko on•angaha.
Batanggimin bilsirango South Garo Hills a•jao mobile network-rang namjae manderang neng•nikanirangko chagrongna nangtokahaoba Conrad Sangma an•tangan, mobile company-rang baksa agangrike, South Garo Hills a•jani diltubarsranggipa songrangon mobile network-rangko man•e on•aha ineba Rongara-Siju constituency-ni NPP candidate aganaha.
