Shillong, Feb 15: Shillong songjinmani Sadar Police Station-o National Emergency Response System (NERS) Public Safety Answering Point (PSAP) facility-ko rikna sorkarini chamatgipa tangka paisarangko jakkalsreta ine matnange rim•ako man•gipa Meghalaya Police-ni gitcham Assistant Inspector General (AIG) GK Iangrai-ko Mongolbar salo jamino watpilaha.
An•tangko watpilani ja•man kobor ra•timgipa manderang baksa agangrikengon, uni kosako matnanganirang donggenchimoba ua dosgri ong•ani a•sel da•o jakgitel watako man•aha indiba uko police-rangni ning•o donengmiting somoio una on•gimin bilrangko pe•aha ine Iangrai parakataha.
“Angni jakrang rongtalgipa ong•a aro angni jako dosgrirangni an•chirang dongja. A•songni ainko chalaianio anga chu•gimik bebera•gipa ong•a aro angni janggi bon•kujaskal anga kakket bichalna dakgrikangkugen,” ine gitcham AIG aganaha.
Police Department-ni kosako matnange aganangengon, police department-o grengrang bang•en donga aro gipinrangni ong•gija kamrangna ukosa matnangaha ine Iangrai parakataha.
Iani bidingo ua bang•en RTI-rangkoba ka•aha aro ia RTI-rangan police department-o ong•gija dakanirangko parakgen ineba ua aganaha.
Uko matnange rim•anio politics-ni gita jak donga ine janapatengon, iani a•selan una aro uni nokdangna kenchakna nanganirang dongenga ine Iangrai parakataha.
HNLC-ni gitcham dilgipa Cheristerfield Thangkhiew-ko so•ote galanio jak donggipa apsan manderangan, uko rim•na chalakki dakanioba jak donggiparang ong•a ineba gitcham AIG parakataha.
Shillong-o Nationwide Emergency Response System (NERS) building-ko rikna gita chame on•gipa tangka paisarangko jakkalsreta ine matnange, re•anggipa October 28 tariko saksa Darwin Sangma minggipa mandeni CID-na FIR ka•ani ja•man Iangrai-ko November 2 tariko rim•ahachim ine nikna man•a.
