Shillong, Jan 15: South Shillong-ni MLA aro Cabinet Minister-ba ong·enggipa Pa Sanbor Shullai, a·jatangni ning·o donggipa Madan Laban aro Riat Laban-ni ning·ogipa rama dildokrangko gital bimingrangchi mingjite segimin rong·plengrangko mija Sonibar salo jolni manderangna parakate on·angaha.
South Shillong-ni ning·o donggipa dildok ramarangko biming mingjitgipaoniara – Babu Hajim Kissor Sing Nongbri Road, Phinton Mylliemngap Road, Nomiwell Rynjah Road, Dennis Dunn Road, Moshondro Roy Road aro Brington Mylliemngap Road iarang ong·a.
Mingjite segimin rong·plengrangko joltangni MLA-chi parakate on·angani somoio, Rangbah Shnong Iostar Sun, Shnong-ni secretary RG Marbaniang aro Riat Laban aro Madan Laban gittim damgnini Dorbar Shnong-ni manderangba dongpae bak ra·angtokaha.
Ramarangko gital bimingrangchi mingjite on·anina jolni Rangbah Shnong, Iostar Sun, joltangni MLA-ko mittelpilangengon, Shnong ba gittimo songdongpagijagipa manderangni bimingrangchi skango minggipa ramarangko biming mingjitna gita ian a·jani manderangni ru·utbea bilsirangoni nangnikbeenggipaba ong·achim ine ua parakataha.
Unomiting, joltangni MLA Pa Sanbor Shullai-ni tom·ao aganprakangengon, a·jani manderangna ua mikkangchiba apsandake kamko ka·angkugen aro a·jatangni nanganirango an·tangoniko antigimik aro konta 24-rangna kingkingan dakchakaniko man·aigen ine aganangenba, gipin politicianrang aro sorkari officer-rangni an·tangtangni man·gninasan manderangni nikaniko kamko ka·mike mesokaianina ua an·tangni suk ong·gijanikoba parakangjolaha.
Ru·utgija salrangni gisepo ong·nasienggipa a·doko lekka pu·onani somoio joltangni mande sakantikon bak ra·tokchina gita didiangengon, batanggimin changni eleksino Laban jolo bang·gija percent-san vote-rangko pu·ontokaiaha ine aganenba, ianpako ong·gnigipa eleksinni somoio a·palrangchi roromna ong·katgija aro picnic-rang cha·na ong·katgija pu·onani somoio bakko ra·tokchina gita sakantikon mol·molangaha.
