Shillong, April 17: India-ni GS Presendency-ni ning·o, Space Economy Leaders Meeting (SELM)-ni brigipa tom·aniko Shillong-ni Marriot Hotel Courtyard-o ong·atanggipao a·dokni skotong minister Pa Conrad K Sangma, bakko ra·angenba, a·doko songdonggiparangni namgnina aro manderangni janggi tangani gadangrangko tang·doatna gita a·dok sorkarini tik ka·anirango space technology-ni kamrangan mongsonggipa ong·a ine parakataha.

A·doko chi-bana ong·ani obostarangko nambate niroke kamrangko ka·na gita policy-rangko tarianio aro dingtang dingtang biaprangko ma·sie ra·anio NESAC baksa nangrime kamko ka·anichi a·dok sorkari space technology-ko jakkale kamrangko ka·na gita man·enga ineba Pa Sangma aganangaha.

Pa Sangma-ni aganani gitade, a·doko chi-bana ong·ani obostarangko scientific-ni bewal gita niroke kamrangko ka·anio space technology namen jakkaltogipa ong·an baksa, a·dokni pilak buring-bolgrimrangko ma·sina gita dakchakaniko aro climate-ni dingtanganichi bang·a neng·nikanirangko namatna gita dakchakanikoba on·a.

Indake ong·engon, Meghalaya a·doko songdonggipa manderangni namgnina aro nambatgipa cholrangchi dangdike on·na gita da·oni chasongo pilak man·enggipa technology-rangko jakkale a·dok sorkari man·adipet kamrangko ka·atenga ineba skotong minister Pa Conrad Sangma agandapataha.