Shillong, April 17: India a·songni G20 Presidency-ni ning·o, a·dokni skotong Shillong-o G20 Space Economy Leaders Meeting (SELM)-ni tom·aniko Sombar salo ong·atangaha.
Ia salgnina ong·atenggipa tom·bimonganiara, mikkangchi science mission-rang baksa nangrime kamko ka·na aro Department of Space aro ISRO-ni dingtangmancha bil gnanganirangko mesokangna gita miksongani ong·enga.
Tom·aniko, Shillong-o donggipa Marriott-ni Hotel Courtyard-o do·ga oe on·angani somoio, Meghalaya a·dokni skotong minister Pa Conrad K Sangma, ma·mongni State (Finance) minister Pa Pankaj Chaudhury, ma·mongni State (Ind. Charge) Science & Tech-ni minister Dr Jitendra Singh, G20 Sherpa Amitabh Kant, Department of Space (DOS)-ni secretary, Pa Somanath S, IN-SPACe-ni chairman Dr Pawan Kumar Goenka aro gipin niksenggipa aro dal·dalgipa manderangba bakko ra·angtokaha.
Tom·ao a·dokni skotong minister jinmana aganprakangengon, space technology aro economy-ni bidingo chanchirimaniko dakna gita dingtangmancha a·songni Prime minister-ni iana pangchakaniko done G20 programme-rangko a·song gimiko ong·atenganina an·tangni kusi ong·aniko parakatan baksa, Shillong songjinmaoba ia programko ong·atna man·enganichi namen rasong chabeani ong·chongmota ine parakangaha.
