Tura, June 20: Adita salrangna skang parakatgipa Secondary School Leaving Certificate (SSLC) porikkani mark-rangko nipiltaiani ja•man Top 20-ni gittamgipa biapko man•rikgipa Garo Hills-ni chatro saksako da•o gnigipa biapona ra•doatskaaha aro uandaken da•o Top 20-ni skanggipa aro gnigipa biapko Garo Hills-an chegopgipa ong•aha.
SSLC porikkani result-rangko re•anggipa June-ni 10 tariko parakatanio Sherwood School-ni chatro Arghadeep Ghosh-na Top 20-ni gittamgipa biapko on•ahachim indiba uni mark-rangko nipiltaion, Maths subject-o uni man•gipa mark ge•sako uni chu•gimik man•gipa mark-o changualaha ine nikenba da•o uko Top 20-ni gnigipa biapona ra•doatskaaha.
Sherwood School-ni chatro Arghadeep Ghosh, da•o Maths subject-o 98 mark-rangko man•skaaha aro uni chu•gimik mark-ba 569-ona tang•doange ua, Top 20-ni gnigipa biapko Shillong-ni dingtang dingtang skulrango poraigipa chatro chatri sakgni baksa sualgrike man•aha.
SSLC porikkani result-o Top 20-ni skanggipa biapko Dalu-o donggipa Woodland Secondary School-ni chatro Arghadeep Saha aro Marbisu-o donggipa St Paul’s Hr Secondary School-ni Amebaaihunsa Kharbih man•rikskaahachim.
