Shillong, June 1: Budbar salo, pilak political dolrang baksa tom·e chanchirimangani ja·man, state reservation policy-ko nipiltaina gita a·dok sorkari, expert committee-ko songe on·angaha ine Bristibar salo, a·dokni Cabinet Minister aro Committee-ni Chairperson Dr M Ampareen Lyngdoh parakataha.
Iani bidingo kobor ra·timgiparangna talataniko on·angengon, Budbar salo dingtang dingtang political dolrang baksa chanchirimanio state reservation policy-ko nipiltaina nangenga ine nikahani gimin a·songni ain aro niam bidiko pangchake, ia reservation policy-ko nipilna gita a·dok sorkari, expert committee-ko songna tik ka·aha aro reservation policy-ko nipilahaon da·ontal mikkangchi rake ja·rikna gita roster-ko ra·gatanggnok ine Lyngdoh parakataha.
Law Minister-ni parakatani gitade, reservation policy-ko nipiltaiani bidingo name chanchirimna pilak political dolrangan diditokahani gimin a·dok sorkari, pilak political dolrangni ku·pattianirangko ra·e reservation policy-ko nipiltaina gita Expert Committee-ko songna gita roster reservation committee-na u·iataniko on·ataha.
Ia Expert Committee-o Constitutional Law, Economics, Sociology, Demographic Studies aro dingtang dingtang kamni a·bao u·i-ma·sigipa manderangko donatgen ineba Lyngdoh parakataha.
Iani bidingo pilak political dolrangkon, an·tangtangni chanchiani aro ku·pattianirangko sal 15-ni gisepon see on·atchina gita committee-ni chairman didiataha.
