Shillong, Oct 15: Bristibar salo, Shiromani Akali Dal-ni dilgipa aro Delhi Sikh Gurdwara Management Committee-ni president Sardar Manjinder Singh Sirsa, Meghalaya a•dokni Governor Satya Pal Malik-ko grongenba, Shillong songjinmani Sweeper’s Colony-o songdongenggipa manderangko Meghalaya sorkarini, dingtang biapona apjitatna miksongenggipani bidingo agangrikangaha.
Meghalaya Governor-ko grongani ja•mano kobor ra•timgiparangna agan-talataniko on•angengon, Them Iew Mawlong-ni Sweeper’s Colony-o songdongenggipa manderangko a•dok sorkarini gipin biapona apjitatna miksonganiara, a•bachengonin chanchisoe tik ka•giminsa ong•a aro sorkari, ia biapo songdongenggipa manderangko a•rikgalnasa miksongenga ine Sirsa parakataha.
Ia Sweeper’s Colony-ni bidingo am•sandina gita songe on•gipa high level committee (HLC)-ni daitoara sorkarina recommend ka•e on•anisan ong•aiachim indiba ia committee, nangana bate jakko on•aha ineba Akali Dal-ni dilgipa parakataha.
Meghalaya sorkari, election-na miksonganirang dongesa ia biapo songdongenggipa manderangko a•rikgalna jotton ka•enga ineba ua matnange aganaha.
Sirsa-ni aganani gitade, ia biapo ong•gipa obostara da•o dipet high court-ni jakon ong•kuengani gimin ia biapko jako ra•kujachina gita High Court-ba sorkarina ge•etaniko on•manahachim.
Ia Sweeper’s Colony-o songdongenggipa Dalit Sikh-rangko gipin biapona apjitatchina gita HLC-ni recommend ka•aniko ra•chakjachina gita iana skangba Sirsa, Meghalaya a•dokni Chief Minister Conrad Sangma-ko didiatahachim.
Ia biapo songdongenggipa manderangko gipin biapona apjitangna gita Meghalaya sorkarini tik ka•ani ja•man Akali Dal-ni dilgipa Shillong-ona re•baaha aro da•o ua a•dokni Chief Minister Conrad Sangma-koba gronge iani bidingo agangriknaba gnang.
