Tura, Dec 14: South West Khasi Hills a·jani Kalapahar songo donggipa nok te·gniko re·anggipa Robibar attamo mongma matterang pe·e donangaha indiba rasong gnange darangba saknaanirangko man·jaha.
Iani bidingo Hub News-na seachi u·iatengon, Robibar attamni 7:30 bajimango mongma matterang Kalapahar songona re·angenba Kurinath Ch Sangma aro Suji P Marak minggipa mande sakgnini nokrangko pe·e galangaha ine United A·chik Youth Federation (UAYF)-ni president Sanggra M Marak parakataha.
Marak-ni u·iatani gitade, ia songo gimik nok te 22-mang donga aro ia nokrangko mongmarangni pe·aniko knaon songni manderang bakan ua biapona chrik a·boke rikbatokaha aro mongmarang ja·mano ua biaponi re·angaha.
“Sombar salonan ia mongmarang Kalapahar-oni ata kilometre-mang chel·aon dongkuengani gimin songni manderang ia mongmarangna kenchipchipe dongtokna nangkuenga,” ine Marak parakataha.
Batanggimin somoirangoba ia Kalapahar jolrangona mongma matterang re·bae manderangni dongchakenggipa nok-jamrangko pe·e galangahachim aro uandaken jagittamni gisepo ian gittamgipa changna Kalapahar songni nokrangko mongma matterangni pe·e galani ong·engaha ine UAYF-ni president parakataha.
Koborko on·ani gitade, re·anggipa October-ni 10 aro 11 tarikrangoba mongma matterang, ia songona re·bae komibeoba nok te 15-ko pe·e galangaha aro uandaken ia songni sak 55 manderang nok-jam gri ong·atako man·tokahachim.
