Vijayawada, Nov 4: Bristibar salo, Syed Mushtaq Ali T20 Cricket tournament-ni skanggipa kal•susaanio Meghalaya dol, Mizoram dolko 9 wicket-rangchi cheangaha.
Ia kal•susaanio Meghalaya dolna kal•chengenggipa Kishan Lyngdoh aro Chirag Khurana, skanggipa wicket-na 79 runs-rangko man•e on•aha aro uamangni nambee kal•anichi Meghalaya dol, Mizoram-ko chena man•aha.
Ia kal•susaanio Kishan Lyngdoh, changchet 4-ko doke aro changsa 6-ko doke 52 runs-rangko dokna man•aha aro Chirag Khurana-ba changbonga 4-ko doke 42 runs-rangko dokna man•aha. Re•anggipa bilsiona kingkingde Khurana, Maharashtra dolnasa kal•kuengachim aro uandaken ia bilsio ua skanggipa changna Meghalaya dolna kal•skaengachim.
Lyngdoh-ni ja•man dokna re•bagipa Rohit Shah sichipgija, rong 10 ball-o 12 runs-ko dokangskaaha.
Iana skang, Mizoram dolni dokchenganio Meghalaya dolni nambee ball-ko goanichi on•gimin 20 overs-o sak 3 wicket-ko gimaate 102 runs-kosan dokna man•aiahachim.
Meghalaya dolni ball goanio Khurana aro Dippu Sangma wicket ge•prakko man•aha.
Da•o changgipin kal•aniko Meghalaya dol, Sikkim dol baksa Sukrobar salo kal•angskagen.
