Shillong, July 4: Taridapgimin Meghalaya Professions, Trades, Callings & Employment Tax Act-ko Sombar salo Meghalaya Cabinet ra•chakangaha.
Ia Act ba niamko taridapahani gimin da•o kosako janapgimin kamrangna pilakan register ka•na gita nanggnok aro Schedule Area-rangode registration ba biming segataniko District Council-rango ka•gen indiba Non-Schedule area-rangode Taxation department ka•skagen.
Iani bidingo talataniko on•angengon, skango gong 50,000-na bate komibate dormahako man•e gamna nanggipa kajinako da•ode gong lak 1.8-na komibate dormaha man•gipa manderang gamna nangjawaha ine Meghalaya a•dokni Chief Minister Conrad K Sangma parakataha.
Dormahani kri kajina gamna nanggipa dolrangni bidingo talataniko on•angengon, gong lak 1.8-oni gong lak 3-ona gong 500, gong lak 3-oni lak 5-ona gong 1000, gong lak 5-oni lak 7.5-ona gong 1500 aro gong lak 7.5-na bate man•giparang gong 2500 kajinako gamna nangskagnok ine Chief Minister parakataha.
Ia apsan salon, Meghalaya Cabinet, National Law University Ordinance 2022 aro East Garo Hills a•jao donggipa Rongjeng Model Degree College-na sanctioned post-koba ra•chakangjolaha.
