Shillong, August 26: Meghalaya a•doko Tuberculosis ba TB saaniko chu•gimik bon•atna gita National Health Mission-ni ning•o National Tuberculosis Elimination Programme-ko ong•ataha.
TB sabisini bidingo agantalatanirangko dake mikrakatanirangko on•anio East Khasi Hills a•jani District Tuberculosis Office, awareness programme-ko Burden of Tuberculosis ine katta bichongko done, H. Elias Memorial Higher Secondary School, Shillong-o August 26 tariko ong•ataha. School-o poraienggipa chatro-chatrirang baksana skigiparangnaba TB sabisiko man•aoniko champengsamsoani, sabisi man•aniko u•iani chinrang aro sagipa mandeko sanna banani cholrangni bidingo talataniko dakaha.
Tom•aniko school-ni Principal Brother Anant. Prasad-ni rimchaksoani kattarangchi a•bachenge Tuberculosis sabisini bidingo kan•dikgipa dakmesokaniko St.Edmund’s College aro Women’s college-ni Bachelor of Social Work Intern-rang mesokangaha jeon TB sabisini batroroani, saani chinrang baksana sabisiko sanna amani aro sabisi man•aoniko champengsona man•anirangko mesokangaha. Indake, TB saa man•enggipa manderangna dakchakani, bakrimani didigrikanirangko on•na nanganirangko bi•sarangna talatangaha.
Tom•anio agantalate on•na dingtangmancha okamatako man•gipa District Programme Coordinator, Gilbert Kurbah, TB sabisini gimin chu•gimik talaniko on•aha jeon TB saaniko rokomsa sabisi jean sanna banna man•gipa ong•a ine janapaha. Iandakgipa program-rangko ong•atanichi school bi•sarangba noktangtangni manderang baksana noksul songsulrangna sabisini bidingo agantalate on•skanichi mingsa nangchongmotgipa kamko ka•paani ba dakchakanirangko on•gilpaani ong•anggen ine aganaha. TB saaniko man•gipa mandeko chu•gimik sanna banna jadokmang sal somoirangko nanga. TB Preventive Therapy-rangko jakkaleba saa man•gipa mandeni nokdangni manderangnaba simsakanirangko on•sona man•a.
Kurbah, school-ni pilak skigipa aro bi•sarangko 2025 bilsirangode TB sabisiko chu•gimik bon•atna kam ka•enganio bil amatangtango dakchakanirangko mikkangchi on•angpachina didiangaha. Sanna bananirangko senggnang dakna man•na gita sabisi man•ani chinrangko ma•sina jotton ka•china bi•sarangko aganaha.
Tom•aniona mongsonggipa sokgipa District MCH Officer, Dr. E. Kharmuti, BCG bijiko su•samsoani aro TB saaniko ta•rake u•ina jotton ka•e tangka paisana neng•nikanirangko chanchigija indin sanna bananiko on•enggipa Sorkari hospital-rangona re•angchina u•iataha.
Tomanio, Oniwell Mylliemngap, songdonggipa manderangni damsan meli-nangrime kam ka•anichisa a•doko sabisi man•anirangko komiate, a•dokko TB sabisi grigipa (TB free state) ong•atna man•gen ine aganangaha.
Tom•ani bon•kamao State Coordinator Tracy Kharkamni-ni dilanio TB Pledge-ko mingdilenba school bi•sarangko TB sabisini gimin kakketgipa u•anichi sabisiko bon•atanio mikkangchi ja•ku de•pachina mol•molangaha. Tom•anio East Khasi Hills a•jani District Tuberculosis Center-o kam ka•giparang baksana Nongthymmai Urban Primary Health Center-ni manderang bakko ra•angaha.
