Guwahati, March 29: Congress dolni dilgipa Te Rahul Gandhi-ko parliament-ni membor ong·aoniko ra·galani bidingo chanchirimna gita Butbar salo, Assam assembly-na tom·bimonganio warachakgipa Congress dolni adjournment motion-ko ra·baani ja·man, Assembly ning·ao adita jegrikanirangko ba jikjakanganiko nikna gita man·aha.
Butbar salo assembly tom·aniko dakna skangan, warachakgipa dolni dilgipa Pa Debabrata Saikia-ni dilanichi Congress dolni MLA-rang gisim ba·rarangko gane, lekka pal·takrango seanirangko ra·bite Assembly-ona re·jomange jegalaniko dakangahachim.
Assembly ning·ao, warachakgipa dolni dilgipa Pa Debabrata Saikia, Te Rahul Gandhi-ko ra·galani bidingo naatenba, parliament-ni memboroniko Te Gandhi-ko ra·galanichi Constitution-ni niamko NDA sorkari pe·aha ine janapangtaipilaha.
A·songni niam-bidikara darangnan apsan ong·a, aro ia niamko chel·chakna gita executive, kraa bewalo kamko ka·na nanga ine janapangenba, Constitution-ko namedake rakkichina mol·mole a·songni President-na chinga, resolution-ko on·atna gita nangnikenga ineba Pa Debbrata parakataha.
Iana, bichal ka·ani mamlarangko assembly-ona ra·bae chanchiania kraa ong·ja ine Assam-ni skotong minister Pa Himanta Biswa Sarma-ni aganchakanganina, dingtang dingtang warchakgipa dolni memborrang gimikan Congress dolni MLA-rang baksa bakrimpaenba jegrikanirangko dakna gita a·bachengaha. Uandake, Te Rahul Gandhi-na chake lekka pal·takrango seanirangko mesoke chrik-a·bokanirangko dakangengon, BJP dolni memborrangba apsandake Te Rahul Gandhi-ni kosako ku·rangrangko on·angtokskaaha.
Salni tom·aniko minit 15-rangni ja·man daktaipilahaoba, Assam-ni skotong ministerni aganchakna a·bachengon Congress-ni MLA-rang baksana Independent membor Pa Akhil Gogoi-maang apsan biapona re·ange lekka pal·takrango searangko mesokangtaikuaha.
Iani bidingo, warachakgipa dolrang, house-o chanchirimna on·gimin bilko pe·aha ine skotong ministerni kosako matnangenba, Assam legislative assembly-ni Principal Secretary-naba uamang official-ni gita chittiko sedoangaha.
Iakoba poraie nina man·gen: Roster system-ko VPP-ni jegalanina ACHIK matnanga
