Williamnagar, Aug 14: Ia sal somoirango social media gita manderangko cha•bokanirang batroroengon, tangka gamgenchimode gonagipa teer nombor-ko on•atgen ine social media gita cha•bokna jotton ka•gipa mande saksani kosako Hub News (Garo Section)-ni Chief Editor Simon George S Marak, Williamnagar Police Station-ni officer-in-charge-o FIR ka•doangaha.
Marak-ni FIR-o badi ka•doangani gitade, August-ni 13 tarik attamni 7:00 bajimango, saksa Achilla K Sangma minggipa mandeni message-ko man•soaha aro ia mandeni watatgipa message-o ‘August 14 tarikna Shillong Teer-ni gonagipa nomborko nangenga ong•ode +917085844599 nombor-ona WhatsApp ka•atbo, FR aro SR-na 100% sure ong•gipa nombor minggniko on•atgen’ ine Hindi ku•sikchi seataha.
Saksa journalist ong•e ia mandede uko cha•bokna jotton ka•enga ine chanchichipenba bakan Marak, on•gimin nomborona WhatApp ka•ataha aro iara bebema ine ua mandeo sing•ataha. Uni iandake sing•atani ja•man, ua mande August-ni 13 tarik attam 12:28 bajio gipin mandena on•atgipa nomborrangko sakkina una watatskaaha.
Sakgipinna watatgipa nomborrang chu•sokgipa ong•aha ine mesokna sakkiko on•atani ja•man ia mande, Marak-oniko skanggipa nomborna gong 5,500 tangkako on•atchina aganataha aro ua gong 1000-ni tikitko bree gong 80,000 man•genchimode unoni 50 percent ba gong 40,000-ko gamna nanggen ine aganataha.
Ia mandeni iandakgipa message-ko watatani ja•man iade cha•boktelgipasa ine ma•sienba Marak, an•tangko GPay dongja ine una aganataha aro uni bank account-rangko watatskachina aganaton, Shrabani Saha minggipa mandeni 31342890888 account nombor baksana SBIN0000181 IFSC-ko una watataha.
Ia bank account-ni bidingo ua name am•sandion, ian Tripura Usha Bazar branch-ni account-sa ong•a ine ma•sina man•aha aro iani bidingo ua mandeo sing•sandiaton, ia account uni jikgipani account-sa ong•a ine ua mande aganchakataha.
Uni indake aganchakatani ja•man, ia kamo Shillong-ni manderangba jak dongengnaba gnang ine chanchichipenba GPay nomborko on•atchina Marak aganatskaaha indiba ua Tripura-ni saksa Mohitosh Roy minggipa mandeni QR code-ko watattaiaha.
Uni ja•man ia mande, Marak-na phone ka•taitaienba, gong 5,500-ko gamchina aganataha indiba una tangkako gamna jechakon, ua mande uko ku•wattogija kattarangchi saina a•bachengskaaha.
“Iandake cha•boke cha•na jotton ka•giparangni kosako rakgipa ja•kurangko de•jagenchimode Garo Hills aro Meghalaya a•dok gimiknin manderang cha•bokako man•naba gnang,” ine Marak, FIR-o janapatenba, niamo pangchake ia manderangni kosako rakgipa ja•kurangko de•china police-rangko didiataha.
Na·simang ia video-koba nina man·gen:
Na·simang iakoba poraina man·gen: Silchar Medical College-o kam ka•gipa ba poraienggipa me•chikrangko simsake dongchina ge•etaniko
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub
For news & updates, Download Hub News App from Google playstore
