Shillong, Feb 23: Meghalaya Trinamool Congress (TMC), uamang dolni mikkangchina niksamsoenggipa kamrangko aro TMC-ni dilgipa Dr. Mukul Sangma-ni a·dokni manderangna ku·rachakanirangko a·dokni manderangona sokatna gita miksonge, batanggimin chasongoni Super Mario series-oniko ra·enba eleksino nangchape tarigimin ge·sa video game-ko Bristibar salo oprake on·angachi dingtang dake campaign-ko ka·angskaaha.
90 jolni bi·sarangni kal·na namen namnikgipa ge·sa video game-oniko nangarangko ra·sroe tarigipa election campaign-ni video-ni gimin bang·a manderangni social media-rango adita seatanirangkoba niksona gita man·aha.
Chu·gimik minit-gnina tarigipa animated video-o, TMC dolni eleksinna Meghalaya-ni manderangna ming 10 ku·rachakanirangko man·chapatan baksa, Dr Mukul Sangma-ko saksa re·dilna changgipa ong·e mikkangchina re·mikkanggnio bang·a neng·nikanirangko cheangeani ja·man, Meghalaya-ni skotongo TMC-ni nisanko songe donena gita man·atachi game-ko matchotateaniko mesokaha aro changgnina kingking a·dokni skotong minister ong·gipa Dr Mukul Sangma-ni ianpakni eleksino susarimgipa BJP aro NPP-ni dilgiparangko amchepatanikoba video game-o mesokaniko nikjolna gita man·aha.
Iana agreba, TMC dolni mikkangchina bang·a ku·rachakgiminrangoni, WE Card, MYE Card, FARM assistance scheme, pension man·gniko bariatani, chatrorangna laptop-rangko sualani, block damantio model school-ko kulliani, ma·gipa aro bi·sarangko sanchakram biaprangko kuliani aro janggi tanganio kamaiani bang·a cholrangko on·ani giminba video-o mesokangjolaha.
