Tura, May 16: Meghalaya a•doko All India Trinamool Congress (AITC)-ni sak 12 MLA-rangoni saksni MLA-rang, re•baenggipa 2023 bilsini Meghalaya Assembly election-o susana gita NPP-ni tikitko bi•na uko grongeaha ine Sombar salo, Meghalaya a•dokni Chief Minister aro NPP-ni national president Conrad K Sangma parakataha.
Sombar salo Rongjeng-o NPP-ni jinma tom•bimonganiko ong•atanio bakko ra•engmiting somoio iako a•dokni Chief Minister, jinmana parakataha.
“AITC-o napanggipa sak 12 Congress MLA-rangoni saksnide angko grongenba, mikkang bilsini election-o susana gita NPP-ni tikitko bi•aha. Ia MLA-rang, AITC-o napangaoni jasani gisepon angko grongeaha aro ian Trinamool Congress-ni dilgiparangna namen dukni katta ong•enga,” ine Chief Minister parakataha.
Ia MLA-rangara da•o dipet Opposition MLA-rang ong•engani gimin da•o uamang AITC-oni ong•kate katgenchimode Anti-Defection Law-ko pe•ani gita ong•gen inenba Conrad, ia MLA-rangni bimingrangkode parakskajaha.
“Ramarango, bazar antirango manderang pilakan ma•sienga, badia MLA-rang AITC-ko wate katna sienga,” ine Sangma aganaha.
AITC-ni bang•a dilgiparangan doltangoni ong•katna sienga ine AITC-ni dilgiparangko chonnika gnang janapatengon, “AITC-o napanggipa sak 12 MLA-rangoni bang•batan AITC-o ong•jawaha,” ine Chief Minister parakataha.
Indake ong•engon, NPP-ni mitam constituency-rango NPP-ni candidate-rang dongmanahani gimin AITC-ni saksni MLA-rangnade biapko on•na man•jawaha ineba Chief Minister parakataha.
“Chinga uamang gimikanade tikitko on•na man•jawaha maina chingo an•tangtangni candidate-rangan dongmanaha,” ine Sangma aganaha.
