Williamnagar, May 16: Meghalaya a•dokni Minister Pa Conrad Sangma, East Garo Hills, Rongjeng-ona re·ange FOCUS-ni programe-o mongsonggipa sokgipa ong·e ua jolo game ge·e cha·enggiparang baksa mikkang chake agan golporimaniko May 16 tariko dakaha.
Pa Sangma FOCUS programme-ni bidingo talatengon, ian dingtangmancha game ge·e cha·giparangni sajinmani somoio noksan ong·aniko nike ge·a gamaniko nambate a·bachengtaichina miksonge sorkarini dingtangmancha salgro salaram a·dokrangna chamatgipa tangka paisa ong·enga. Da·alo sorkari FOCUS programme-ni ning·o tangka gong kror 220-ko jakkalaha jean sak lahk 4.5 gamgiparangna tangka paisachi dakchakana man·aha. Ia programme-ni ning·o sak 10-20 manderangni nangrimgimin dol dongna nanga jeon sakprakna gong 5000-ona dakchakaniko sorkari on·enga ine Skotong Minister Pa Conrad Sangma aganaha.
Rongjeng-ni badiaba bakrango FOCUS-ni tangkarangara chotpilna nanggipasa ine jajaanirang dongengani gimin, ian dingtangmancha sorkarini game ge·e cha·giparangna on·enggipa tangkasa unigimin chotpilna nangani dongjawa ineba Pa Sangma talatdapaha.
Skotong Minister a·dokni pilak bakrangonan re·e gamgiparangko gronge man·a dipet nangnikanirangko ui·na gamgiparang baksa mikkangchakgriken agangrikenga.
Tom·bagiparangna skotong Minister aganprakengon, a·dok sorkarini ning·o dingtang dingtang a·jao gamgiparang jedake Milk Mission, Piggery mission, poultry mission, ginger mission, goatery mission aro gipinrangna tangka gong kror 1000-na baten chamaha ine jinma ui·atjolaha.
Adita bilsirangna skangmangmangsan FOCUS programme-ko a·bachengatahaoba uchi bang·a game ge·e cha·giparang namgniko man·engaha ineba Pa Sangma aganaha.
