Agartala, June 3: Bilsi-brina skang saksa bank manager-ko ka·saninggija su·e so·otgipa sakbri manderangko janggi tanga gimikna pattoko chipchina gita mija Sonibar salo Tripura-ni kachari raiko on·angaha.
Dos dakgiparangni kosako West Tripura District and Session Court-o Judge Subhasish Sharma Roy-chi bichalaniko dakanganio, janggi tanga krip pattoko chipata baksanaba sakprako gong hajal 50,000 ka·e dai gamchinaba uamangna hukumko on·angaha. Iani gisepon, gong hajal 50,000 daiko gamjagenchimode, pattok ning·o donga joljolan jagittamrangna rakgipa kamrangko ka·na nanggnikoba kachari rai on·angjolaha.
Koborni gitade, batanggimin 2019 bilsi August 3 tariko, salgro Tripura district-ni Dharmanagar-o donggipa United Commercial Bank (UCI)-ni saksa bank manager Bodhisatwa Das-ko sakbri manderang matsramgipa bostuchi su·e so·otahachim aro dosko dakgiparanga saksa traffic sub-inspector Sukanta Biswas, sakgni bading-chiwalgipa Sumit Chowdhury aro Sumit Banik, aro saksa Omar Sharif ba Shoaib Mia ine mingklakgipa ong·a ine ma·sina man·aha.
Indake ongengon, sastiko man·gipa sakbrikon Indian Penal Code-ni Section 302 aro 34-rango pangchake kachari dosi on·aha ine dos dakgiparangko sastiona sokatna gita kachario dakgrikanggipa ukil, special public prosecutor Samrat Kar Bhowmik koborna parakataha.
