Shillong, July 28: Hajira ka•e cha•enggiparangna sorkarini ku•rachakgimin tangka paisarangko on•kujaenga ine matnange Thma U Rangli-Juki (TUR)-ni dilgipa Angela Rangad, Main Secretariat mikkango asonge jingjengatengon, iani bidingo una Labour department ba a•dok sorkari, maming seachi ku•rachakaniko on•kujaengani gimin mikkangchiba una ku•rachakaniko on•kujaskal ia biapon asonge jingjengatangkugen ine parakataha.
Rangad-ni parakatani gitade, hajira ka•e cha•enggiparangna sorkarini ku•rachakgimin tangka paisarangko on•kujaenga ine uni matnanganiko niatna gita Labour department-ni principal secretary GHP Raju, una ku•rachakahani gimin ua Budbar attamo Raju-ko gronge agangrikna siengachim.
Indake ong•genchimoba, da•o dipet una iani bidingo maming seachi ku•rachakanirangko on•na dongkujaengani gimin ua mikkangchiba ia apsan biapon asonge jingjengatangkugen ine Rangad parakataha.
Adita salrangna skangsan, East Khasi Hills a•jani deputy commissioner-ba uko Secretariat mikkango jingjengatchina lekka sedoatahachim aro uni ja•man a•dokni Chief Minister Conrad Sangma-ba uni jingjengataniko dontongchina didiatahachim ine nikna man•a.
Budbar salo una chakpaenggipa mitam manderangba re•bae unbaksa bakrimeaha ineba ua parakataha.
Budbar attamo Labour department-ni principal secretary-ko grongani ja•manosa mikkangchi jingjengatangkuani giminde uamang tik ka•gen ineba TUR-ni dilgipa parakataha.
