Tura, March 19: Garo Labour Corps ni matgrikrangko gisik ra·na tarie donenggipa Cenotaph jean Turani Babuparao dongachim, uko Tura Municipal Boardni gita taridaptaiani kamko ka·engahachim. Ia kamko uamang songdonggipa manderang aro NGO rango mamingba golpogrika gri skatang an·tangtangni nangnika gita kam ka·aiaha ine bang·a NGO aro gipin dilgiparang matnangaha. Chengoni gisik ra·na ripingbaenggipa jatni gamko maming saloba manderangni namnika-namnikgijako am·chenggija uamang skatang kam ka·na man·ja, ian A·chik manderangni ka·tongko namen gisik saatani ong·chongmota, Tura Municipal Board iana kraa aganchakaniko on·na nangchongmota ine bang·a dilgiparang agantokaha.
Ia cenotaphko skanggipa a·gilsak gimikni dal·gipa dakgrikani somaio Franceona re·ange 1918 bilsini July 16 tariko re·bapilgipa A·chik matgrikrangko mande ra·e gisik ra·na tarie dongipa ong·achim. Ua dakgrikaniona sak 500 A·chik me·asarangko British sorkari France a·songona watataha, sak 500 oni sak 456san dakgrikani biapona sokangaiaha. 1918 bilsini May jani 25 tariko dakgrika matchotaha. Sak 456 oni sak 120 mangmangsan 1918 bilsini 16 tariko Turaona tange sokbapilaiaha. Ian A·chikrangni ma·ambio dal·begipa gisik ra·ani ong·chongmota.
” Iako nosto ka·aniara ching pagitchamrangni janggitangko on·kange kam ka·aniko mikchepe ra·ani gita ong·chongmota, jatni gamchatgipa aro ripingrikrike rakkienggipa gamrangko kam ka·engon mamingsaloba jinmani nangnikaniko ra·chenggija ka·na nangchongmotja aro ian A·chik manderangni ka·tongko matatbeani ong·chongmota” ine nangrimgimin NGO ni dilgipa L.C Momin uni West Garo Hills DC na seatgipa chittio janapaha.
Nangrimgimin NGO rang jekai GSMC, GSU, Mother’s Union DINDAM ( Durama Imbama Norombi Dikimbe A·chik Ma·giparang) New Tura Development Forum aro gipinrangba iana suk ong·gijaniko parake iako ta·raken taripiltaichina didiangaha.
West Garo Hillsni Deputy Commissioner Jagdish Chelani iani bidingo, NGO aro gipin dilgiparangko okame tom·e chanchidilaha. Ua changrikao dolgnini uisretgrikanirangko talgrike ra·aha, aro ia taridapenggipa kamrangko adita salrangna dontongatchengenga ine Mothers Union ni Secretary Ma Sume Chandola B Sangma Hub Newsna aganaha. Iako nitoe taridape donaniara namen nambea aro nitobegen, indiba chu·gimikko ra·galsrange taribadenade nangtaiskaja ineba Ma Sangma aganaha. “Uamang a·bachengaode iako taridaptainasienga inesan chingna uiataha iani giminsa chinga maming jegalani dongjachim, indiba uamang chu·gimikkon motorwakchi jilruru-jilgale pe·e galanina chinga jagokpilaha” Ma Sangma agandapaha. Unigimin skango jekai ong·a, ua gitan taripiltaina nanggen aro mikkangchide jinmani nangnikao aro uiaosa uamangba dakpachina ineba ua agankuaha.
Na·simang ia video-koba nina man·gen:
Na·simang iakoba poraina man·gen: Khasi-Jaintia Hills-ona relramako ra·baanide manderangosa pangchaka : AL Hek
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in, oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
