Tura, May 14: Tura-ni RC Road-o donggipa Catholic gopramoniko, adita gopramo songgimin silni chisolrangko cha•ogipa manderang cha•oe ra•angaha.

Indake, Robibar salo, ua jolo donggipa adita manderang ia cha•oe ra•angenggipa chisolrangko manderangni auto rickshaw-o gatangenganiko aro ja•achiba chile ra•angenganiko nikrikenba giljani dilgiparangna, Sombar salo koborko on•ataha.

Ia cha•ogiparang, attamchibara ba attam simsimani somoirangosa ia chisolrangko cha•oangaha ine u•ina man•aha.

Cathedral Parish-ni Kamal Fr Arthur Marak-ni aganani gita, ia cha•ogiparang, gopramni a•kolko cho•na jakkalenggipa bosturangko chong•motan, jompol, rua, kodal aro bijolini silitingrangko cha•oangchengahachim. Uni jamano, Robibar salpaksani gisepo, silni chisolrangko auto-o gate ra•angenganiko bi•sa saksa nikrikenba, ja•delgimin manderangna agane on•skaaha. Indake, ia apsan somoion, mande saksani chisol bol 3-ko chilenba gopramni simao tarigimin pakmani be•prugipa gita, chiring joljol Balsrigittim-chipakna chilangenganiko ja•delgimin mande saksa nikrikskaahachim.

“Ia obostani gimin koborko man•soa bakan Sombar salo, chinga gopramko nina re•angaha aro adita chisolrangni gimaaniko nikeaha aro mitam chisolrangko uamang pe•gonggile nosto ka•e donangaha. A•ao songgipa chisolrangko uamang pike donangaha aro cement-chi tarigimin chisolrangkoba uamang matsramgipa ratani bosturangchi ratna jotton ka•ahachim. Ia a•selni bidingo Police-o FIR ka•aha aro uamang am•sandianiko dakna, gopramko nina gitaba re•baaha” ine Fr Arthur aganaha.

Ian chonchongipa cha•ukrokrang ba drugs addict ong•ako man•gipa manderang an•tangtangna pekatgipa bosturangko brena inenba silni bosturangko cha•oe palna dakgipa kam ong•a ine chanchichipenga.

Indake iani gisepon, bol 8 silni chisolrangko, Tura Chandmari sepangjolo bostu gitchamrangko chimonggipa biapniko nikena man•aha.

Hub News baksa agangrikengon, ia chisolrangko gitchamahani gimin ra•galskae gitalko tariskana am•enga ine sakgni chadambe panterang ra•baaha aro uamangna gong 2200-ko ia chisolna gamataha ine, ia gitcham bosturangko chimonggipa biapo kam ka•enggiparang aganaha.

Ia a•selni bidingo am•sandianiko dakkuenga aro May 19 tariko, gopram committee-ni gita tom•e chanchirimaniko dakanggen.

Na·simang ia video-koba nina man·gen:

Na·simang iakoba poraina man·gen: Tura-o dam 10 CUET centre-rangko kulia

India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.

Chingko ka·mao mesokgipa social mediarango jarikna man·gen:-

Twitter- twitter.com/nemediahub

Youtube channel- www.youtube.com/@NortheastMediaHub2020

Instagram- https://www.instagram.com/ne_media_hub