Tura, Oct 31: Tura Don Bosco School ni gitchambatgipa skigipa Pa. George N. Marak jean school ko kulichengoni skigipani kamko ka⋅abaahachim re·anggipa October 29 tariko uni ka·sarangko wate jringjrotna neng·takna re⋅angaha. 15 March, 2019-o uni bilsi ritchasa gapaniko gisik ra·na uni dedrang su·drang mija bilsini July 4 tariko Bishop Andrew ni jakchi Misaboliko-on·e dale manidilangahachim.
Balpakram National Park ni sepango gipa Kanai Rongte Rasria songo atchie A·chik a·songni nambatgipa biap Tura ona uni sokbaaniara namen gisiko nangatani aro aiao inmanpilani ong·a. Batanggimin salrangko nipilatode uni gisiko ka·oksianiko Nokgipa Isol knachake aro ka·sachake toromni a·bao kam ka·giparangni jakchi chu·sokataha ine nikna man·gen. Gisik ka·tong gimikchi kakket aro bebeo janggi tanggipa mande ong·anina pilak gadangni manderangan uko da·alonan gisik ka·tong gimikchi mitelkua. Saksa toromo janggi tanggipa mande ong·e ua bang·ani janggi tangani bewalrangkoba ra·doaha.
Bishopni da·o dongchakenggipao Rev. Fr. Anthony Buccieri 1957 bilsio Don Bosco Schoolko a·bachenganio George N. Marak-ko skina okamaoni ua Skigipani kamko ka·chakataha. Maan ra·bee uko uni ka·rimskarang aro poraienggipa bi·sarang George Master ine okamaha. An·tangni chatro rangni chu·sokanganiko nikanian uni gisiko katchabatsranggipa ong·a ine ua aganronga. A·chik a·songni niksengbatgipa political dilgipa jean Lok Sabha-ni aganchalaitimgipa-ni gadangona sokdoahachim Pa. Purno A. Sangma-sagi ba uni chatro saksa ong·enba bang·a tom·bimongani rangon Pa. George Marak ni an·tangko skia pora ni a·bao on·kange kam ka·anirangko aganrongaha.
Pa George nengskime poraiba·ani a⋅sel an⋅tangni dedrang rangko name poraichina aganrongan baksa Nokgipa Isol-o bebe ra⋅e dalataha aro uni nokdang-oni sakgitam degiparangko Isolna dangdike on·china an⋅tangtangko on·kangataha. Uamangara: Sister Barnadeth S. Sangma, Fr. Janarius S. Sangma jean dao Guwahati Salesian Province ni Provincial ongenga aro Sister Mercelina S. Sangma jean Tura Auxilium Convent ni Superior ong·enga. Sister Barnadeth, uni Kenya-o dangdike on·mitingo been-ni an⋅sengijaniko man·e agilsako wate re⋅angaha.
Pa George N. Marak saksa namgipa pagipasan ong·aija indiba ua saksa namgipa skigipaba ong·achim. October jani 30 tariko uko bon·chote mandera⋅ataniko dakna gita Tura ni Cathedral Giljao una Misaboliko on·e Cathedral gopram-o gopaha.
