Tura, Sept 09: Tura Government College-ko a·bachengatani salko gisik ra·na, chang 65-gipa Foundation Day-ko mija Sonibar salo college-o maniangaha aro ia dingtangmanchagipa salko gisik ra·ani salo mongsonggipa ong·e sokgipa Meghalaya Assembly-ni agan-chalaitimgipa Pa Thomas A. Sangma-ko man·chape, PHE Minister Pa Marcuise N. Marak, Education Minister Pa Rakkam A. Sangma; Education Department-ni Advisor, Pa H. M. Shangpliang; aro Education department-ni Secretary Pa Ambrose Ch. Marak-maang gimikba dongpae bak ra·angaha. Indake ong·oba, a·dokni skotong minister Pa Conrad K Sangma, da·o ong·enggipa G20 Summit-o bak ra·na New Delhi-chi doangenba ia manianio bakko ra·na gita choljokskajaha.

Unomiting, tom·aona mongsonggipa ong·e sokgipa Pa Thomas A Sangma, songsalna ua college-ni bang·en on·gilanirangko dakahaniko aganenba, a·doko namen ja·manchakbatgipa a·ja gita ong·kuengmiting somoio Garo Hills -ni chadamberangna bidako on·na gita apale niksamsoani gnang ia college-ko a·bachengate on·anina aro nanga gita kamrangko ka·ahanina college-ko kullidilchenggipa manderangkoba ua dintangmancha mittelpilangaha.

Ia tom·anio a·dokni Education Minister Pa Rakkam A Sangma-ba, an·tangni college-o poraimiting somoiko gisik ra·ate, uni skigiparangko mande ra·bee agananga baksa, 2020 bilsio ra·gatgipa National Education Policy (NEP)ni gimin aro chatrorangni bilsi 4-na poraianirango uamangna dingtang dingtang course-rangko basee poraina gita cholrang donganichi namgnirang dongani gimin bakroe agan-talataniko dakangskaaha.

Salni programo, Tura Government College-ko kulidilchenggipa manderangni nokdangrangnaba ua somoio songsalna on·gilanirangko dakahani gimin dingtangmancha mittelpilskaani gita, memento-rangko gisik ra·na gita on·angaha.

Tura Government College-ko, 1958 bilsio unomiting Meghalaya a·dokni skotong minister ong·chenggipa Pa Captain Williamson A Sangma-ni tangka-paisa on·e dakchakatanichi Garo Hills-oni niksenggipa manderang jekai Pa Mody K. Marak, Pa Harrison W. Momin, Pa Rangam G. Momin, Pa Ranjit S. Marak, Pa Suresh Das, Pa Dolbir Lohar, Pa Rabilal Jaisi, aro Ma Sodini G. Momin, iamangni niksamsoani gnang chadamberangni namgnina kamrangko ka·anichi a·bachengate on·aha.

Ia college-ko 1967 bilsio Assam sorkari jako ra·chengaha, uandake, 1972 bilsio Meghalaya, chu·gimik a·doktangko man·ani ja·manosa ia college-ko da·ode North Eastern Hill University baksa nangdimate chalaiskaenga.

Find latest news from every corner of Northeast India at hubnetwork.in, your online source for breaking news, video coverage.

Also, Follow us on-

Twitter-twitter.com/nemediahub

Youtube channel- www.youtube.com/@NortheastMediaHub2020

Instagram- www.instagram.com/nemediahub