Tura, June 2: Budbar salo Meghalaya a·dokni Chief Minister Conrad K Sangma, Tura Civil Hospital-ni COVID ward-ona re·angenba, ia biapo kam ka·enggiparang aro sanna bananirangko ra·enggipa pilak manderangkon grongangaha.

COVID ward-ona re·angna skang, a·dokni Chief Minister-ba, dongimin niam gita PPE aro gipin nangchongmotgipa bosturangko gane, doctor aro gipin official-rang baksa COVID ward ning·ona re·angaha.

COVID ward-o ua sanna bananiko ra·enggipa manderang baksaba agangrike, saenggipa manderangna ka·dongatani kattarangko aro gipin agan-ku·pattianirangkoba on·angaha.

Minute 20-mangna COVID ward-o sannanirangko ra·enggipa manderang baksa somoiko re·atani ja·man, COVID ward-oni ong·katbapile kobor ra·timgipa manderang baksa agangrikengon, indita ding·ani somoirangoba doctor, nurse aro uandake sanna banani kamrangko ka·enggipa manderang, PPE-rangko gane kamrangko ka·na nangengoba maming neng·nikani grian an·tangtangko on·kange kamrangko ka·tokenga ine Chief Minister mittelpile aganangaha.

“Indita kenbegnigipa aro neng·begipa somoirangoba an·tangtangko on·kange kamrangko ka·engani gimin anga ia somoio hospital aro Covid ward-o kam ka·enggipa pilak manderangkon mittelpilna ska. Uamang pilakan an·ching sakantini mittelpilaniko man·na krachongmota,” ine Sangma parakataha.

Tura Civil Hospital-ni Covid ward-ko nieani ja·mano a·dokni Chief Minister, dingtangmancha hospital-o dangdike on·enggipa nurse-rangkoba gronge, uamangni rakbee kamrangko ka·engani gimin mittelpilangaha.