Tura, Feb 18: Tura-ni gitchambatgipa aro dal•batsranggipa antio bazaar cha•chakram biap Nazing Bazar Complex-ko, a•dokni Skotong Minister Conrad K Sangma, Assembly Speaker Thomas A Sangma, Tura Lok Sabha-ni MP Agatha K Sangma, sorkarini tangka paisarangko jako ra•e kamko ka•enggipa dolrang aro songko noko dilenggiparangni dongpaanio, Sonibar salo nokdonggae on•angaha.
Ia complex-ko New Tura-ni sepangjolo anti cha•chakenggipa biapni jatchio rikaha, jeon, Garo Hills a•jani dingtang dingtang biaprangoni bading chiwalaniko dakenggiparang re•baenba bosturangko palan baksa ia nokdongganio bakko ra•angaha.
Indake, ia dingtang dingtang nanganina jakalna man•enggipa complex-ko rikna man•anichi, Conrad K Sangma-ni dilenggipa MDA sorkarini gita mingsa chu•sokaniko nikna gita man•a. Unbaksana, ia Tura-ni dal•batsranggipa anti cha•chakram biap, Skotong Minister-ni South Tura constituency-ni ning•o ong•a ineba nikna man•a.
Indake, Nazing Bazar Project-ni gimin talataniko dakangan baksa Tura songjinmani namroro silroroanina minggipin project-rangko ra•baengani bidingo Skotong Minister aganengon, manderangni namgnina Integrated Secretariat Complex-koba rikna miksongenga jeon, pilak Department-rang donggen jekai, CM office, Cabinet office, conference room aro pilak nangnikenggiparangko man•chape rikgen. Una agreba, crore 120-130 mangni project-rangko chamataha jekai, IT Park phase 1-koba matchotaha aro phase 2-koba September ba October jani gisepon matchotatgnok aro unbaksana, Tura songjinmako namdapatna aro nitodapatna gita beautification project-rangko bariatna gita mangsongenga inenba aganaha.
A•dok sorkarini gita a•jatangko silroro namroroanina krenge kamko ka•engani gimin Tura-ni MP Agatha K Sangma aganengon, Nazing Bazar Complex-ko rikanio matchotatna man•ahani gimin aro Tura songjinmani dingtanganiko nikna man•engani gimin, an•tangni gisiko katchaaniko parakataha.
“Bang•a neng•nikanirangko chagrongani jamano, Nazing Bazar Complex-ko nokdonggana gita man•aha. Jen somoio, Chanmari kal•chakram biapko oprake on•angon, ian Tura-ni bijangchi ong•gen ine chanchiachim, indake, Tura-ni PA Sangma Stadium-ko tariman•ahaon aro dal•prete Skotong Minister-ni oprake on•anghaon, apsandaken iakon Tura-ni bijangchi ine changnok ine chanchiachim. Indiba, da•alo, ia Tura songjinmani dal•batsranggipa anti cha•chakram biap Nazing Bazar ko nokdonggana gita man•ahaon, ian Tura songjinmani mongsonggipa anti cha•chakram biap ong•gen ine chanchia aro ian an•ching songjinmani namroro silroroanikoba nikna gita man•enga. Indake, ua jolrangko namroro silroroatasan ong•aija indiba Tura-ni Kona noksik gimikon namroro silroroenga inenba nikna man•a” ine Agatha Sangma aganaha.
