Tura, Mar 6: Tura Chandmari-o gital kulidaldalgipa aro nitoe tarigipa Football stadium-o A•chik Holistic Awakening Movement (AHAM) minggipa dol, ma•manti kattarangko see donangenba, Tura jillako nitoatna kam a•bachengataniko nisie gala gita ong•aha.
Ia AHAM dolara, Tura-ko Winter Capital dakchina dabienggipa dol ong•achim aro ia dolni manderang Sonibar walo, ia biapo tarie dongimin light-rangko nisie galan baksana ia stadium-ni pakmarango ma•manti kattarangko see donangaha.
Ia biapo AHAM-ni manderang, ‘Equal Development’ ba ‘Apsan namroro silroroani’-ko nanga ine seade seaha indiba nitoe tarigimin stadium-ko nisie galangskaaha.
AHAM-ni president Georgeprince Ch Momin-ba ia kamko jegalatani pal, facebook-o photo-rangko mesokate ‘painting competition’ ong•enga inesa seatskaaha.
Ia kamko social media-rango niksoani ja•man Tura-o songdongenggipa bang•a manderangan AHAM-ni kamko raken jegalattokaha.
“Maini gimin Tura-ni nitoaniko AHAM nisigalenga. Garo Hills-ni gam-jinrangko uamang nisie galna nangja. Uamang jegalanirangko dakna nanggenchimoba gipin cholrang dongachim indiba iandake pakmarango seani aro Tura-ni nitoaniko nisigalanikode chinga ra•chakna man•jawa. An•ching iandakgipa kamrangko pilakan jegalna nanga aro darangkoba iandakgipa kamrangko ka•na on•na nangja. Iandake jinmani gam-jinko nisie galani gimin sorkari, AHAM-ni kosako ja•kuko de•na nanga,” Tura-ni ja•delgimin mande saksa parakataha.
Chandmary-o name tarigimin robol kal•chakaniko iandake nisie galahani gimin West Garo Hills a•jani District Administration-ba uamangni facebook page-o raken jegalataha aro AHAM-ni kosako ja•kuko de•na mikrakataniko on•ataha.
