Tura, Oct 3: Budbar salo, Meghalaya a•dokni Chief Minister Conrad K Sangma, a•dokni Education Minister Rakkam A Sangma-ni dongpaanio, GREEN (Grassroot Level Response Towards Ecosystem Enhancement & Nurturing) Meghalaya Plus scheme-ko Tura-o a•bachengate on•angaha.
Ia GREEN Meghalaya plus scheme-ara a•dok sorkarini ra•gatgipa Payment for Eco System Services (PES)-ni bak ong•e, buring bolgrimrangko ripingna gita ia scheme-ni ning•o dingtang dingtang songni manderangna hectare-prakon gong 20,000-ko bilsiprako on•anggen.
Batanggimin somoirango sak 3000-na baten manderang ia scheme-ni namgniko man•e, hectare 54,000 buring bolgrimrangko ripingna gita man•aha aro ia GREEN Meghalaya plus-ni ning•o, hectare 50,000 ba 500 sq km buring bolgrimrangko ripingdapna miksonganirang dongenga.
PES 1.0-ode ia scheme-ko jako ra•e buring bolgrimrangko chel•chakna gita komibeoba hectare 2-ko nangachim indiba ia gital scheme-ni niamode hectare 1 buring bolgrimkosan nangaiani gimin bang•gija a•a dongpagipa manderang aro songrangba ia scheme-ko ra•e buring bolgrimrangko ripingna man•gnok.
Ia GREEN Meghalaya plus scheme-ko Tura-o a•bachengate on•anganio a•dokni Chief Minister Conrad K Sangma, jinmana aganprakengon, buring bolgrimrangko ripingna gita sorkarini a•bachengatgipa scheme-ko jako ra•e kam ka•enggipa pilak songrangko aro manderangko mittelpilangenba, batanggimin bilsisni gisepo a•dok sorkari, manderangna namgniko ra•bana gita dingtang dingtang program-rangko a•bachengataha aro iandakgipa program-rangchi a•dokni dal•roroani aro namroro silroroaniko ta•rakbatataha ine aganangaha.
A•dokni dal•roroanina sorkari, a•dokni, ma•mongni aro gipin cholrangoniko tangka paisarangko ra•e jakkalenga aro da•alo a•dokni economy-o dingtanganiko nikna man•engaha ineba ua aganaha.
Buring bolgrimrangko tangatpiltaianio a•dok sorkari, GREEN Meghalaya (PES) scheme-kon mongsonggipa ong•e jako ra•aha ine janapatskaengon, batanggimin bilsignini gisepo a•dok sorkari, buring bolgrimrangko ripinganio gong crore 44-na baten koros ka•aha aro mikkangchiba buring bolgrimrangko ripingna gita gong crore 200-na baten chame donaha ine Chief Minister parakataha.
Ia tom•anio a•dokni Education Minister Rakkam A Sangma-ba jinmana aganprakangengon, ia scheme-ara buring bolgrimrangko chel•chakna aro ripingna gita manderangko didigen ine an•tangni ka•dongchakenganiko parakataha.
Garo Hills-o tangsekgipa buring bolgrimrangan gapa ine janapatengon, sorkarini indake buring bolgrimrangko ripingna tangka paisarangko dakchake on•aniara manderangna namgni ong•gen ine Rakkam aganaha.
Ia tom•anio, Garo Hills-ni dingtang dingtang bakrangoni re•bae bak ra•enggipa manderangba, ia Green Meghalaya Scheme-ko ra•gatanichi buring bolgrimrangko ripinganio songni nokni manderangna dakchakanirangko on•ahani gimin a•dok sorkariko mittelpilangtokaha.
Ia scheme-ni ning•o tangka paisarangko dakchake on•ahani gimin songni manderang, chiring chibisik donggipa biaprango bolrangko ge•na gita tangka paisarangko jakkalna man•aha ineba uamang aganaha.
Ia program-ko ong•atanio, CM Elevate, Focus aro Payment for Ecosystem Services (PES)-ni namgniko man•enggiparangna dingtangmancha cheque-rangkoba suale on•angjolaha.
Na·simang ia video-koba nina man·gen:
Na·simang iakoba poraina man·gen: M’laya Speaker, Plastic Waste Management Unit-ko Selbalgre-o oprake on•a
India A·songni Salgro Salaram A·dokni gitalgipa koborrangko ma·sina sikode na·simang hubnetwork.in,-oniko video-ko niangan baksa poraina man·gen.
Chingko ka·mao mesokgipa social mediarango jarikna man·gen:-
Twitter- twitter.com/nemediahub
Youtube channel- www.youtube.co
Instagram- https://www.instagram.com/ne_media_hub
