Tura, Aug 20: Bang·a manderangni nina sengsoenggipa 2023 bilsini Inter-Mahari Football tournament-ni final-ko mija Sonibar attamo Tura-o dal·e rikatgipa kal·chakram biap PA Sangma stadium-o A·gitok Mahari aro Te·gite mahari dolgnini gisepo me·asarang ga·subee kal·susaangaha, jeon A·gitok mahari, final-o bilake warachakangani ja·man bon·chotao mangmang golsachi chegipa ong·e niksengaha.
Kal·chakram biapo mande chakjapile nigiparangni chakgrimanirang baksa final-ko kal·susaanganio, dolgni maharian kal·a a·bachengaoni, kal·a matchotnasiona kingkingan rakgrike kal·aniko nikangna gita man·aha, indiba chu·gimik kal·atani somoi matchotna minit 5-rangsan dongaiahao, A·gitok mahari rasong gnange Te·gite mahariko golsa chipchote donnna man·aha.
Maharirangni gisepo robol ga·tingsusuaaniko ia bilsio gittamgipa changna ong·atangtaigipaoba, A·chik maharirangoni bang·a kal·giprang robol kal·anio an·tangtangni changa-sapanirangko jakkale bilake aro ga·subee kal·angtokaniko nikna gita man·angaha.
Attamchibara final-ko kal·susaatgipaona Meghalaya- ni skotong minister Pa Conrad K Sangma, gipin dilgiparangni dongpaani gisepo mongsonggipa sokgipa ong·enba bakko ra·angaha, aro kal·a a·bachengna skang, dolgnini kal·giparangko salam ka·e uni namgipa sikanirangko kal·gipa sakantinan on·anga baksa, kal·a matchotani ja·manoba chegipa dolna aro niksenggipa kal·giparangna boksisrangkoba on·angjolaha.
Ia kal·susaanio, dingtang dingtang gadango kal·e niksenggiparangoniara, Bolwari maharioni kal·gipa Chekam Tangrik B Marak, kal·a changgittamo gimik gol 8 (chet)rangko chipenba Top Scorer-na seokako man·aha, doltangko cheatna uni kal·rimskarang baksa nambee kal·anina A·gitok maharioni Bardy Sangma, Best Player-na seoako man·aha, uandake, gol chipatanirangko nambee warachakenba kal·anina Te·gite-oni Jayangbirth T Sangma-ko Best Goalkeeper-na seokaha aro kal·ani namgipa bewalko rakkie gipin dolrangnaba dakmesokanganina Bolwari Mahariko Best Disciplined Team-na seokangskaaha.
Ia apsan salon, PA Sangma stadium-o maharirangni robol ga·tingsusaani final-ko me·chikrangni gisepoba kal·angaha jeon, Mrong mahari dolgipin Mangsang maharini kosako 2-1 golrangchi cheenba Inter-Mahari Football tournament-o skanggipa chang ong·e niksengangskaaha.
Final-ko kal·chakatna, ua somoio referee-ni whistle-ko sikchakatani tapan dolgni maharichi kal·gipa me·chikrang bil·ting-bil·ting robolko ra·grikenba gisiko nange kal·angtokaha. Adita kal·angani ja·man, Mangsang me·chikrang golko chipatchengaha, jechin uamangna ka·donganikoba on·ahachim, indiba Mrong maharini kal·giparang bilake robolko chae aro ra·e kal·angdapenba, ja·mano dolgipinko golgni chippangpile donskana man·eming final-ko chechotangaha.
Me·chikrangni gisepo kal·anio, kal·a gimiko gol 6-rangko chipani gimin Mangsang maharioni Shantila M Sangma-ko Top scorer-na seokaha, Best Player title-na Mrong maharioni Nakatchi M Marak-ko seokaha, aro Mrong-oni sakgipin kal·gipa, Nokambe M Marak-ko Best Goalkeeper-na seokangaha. Uandake, namgipa bewalrangko rakkie kal·anina Cheran mahariko Best Disciplined team-na seokangskaaha.
Watch
Find latest news from every corner of Northeast India at hubnetwork.in, your online source for breaking news, video coverage.
Also, Follow us on-
Twitter-twitter.com/nemediahub
Youtube channel- www.youtube.com/@NortheastMediaHub2020
Instagram- www.instagram.com/nemediahub
