Tura, March 8: Tura-ni Na•jing Bazar jolo donggipa PWD (R) Mechanical Division-ni chowkidar-ko da•si walo ma•sina man•gijagipa manderang so•ote galangaha.
PWD Mechanical Division-ni chowkidar Sapenson G Sangma, walni somoirango pangnan ia office-o tue nitimrongachim indiba da•al Sombar pringo uko office-o kam ka•enggiparang, sie dongakosa office-ona re•bae nikeaha ine kobor on•aha.
West Garo Hills a•jani Superintendent of Police (SP) MGR Kumar-ni u•iatani gitade, ia a•selni bidingo office-o kam ka•enggiparang, da•al pring 9:15 bajimango Araimile beat house-ona phone ka•e u•iataha aro police-rang bakan ia biapona re•bae nion, ia mandeni turonggipa kuturion sie dongakosa nikeaha. Ia mandeni skoo adita mata bu•ani chinrang dongani gimin uko saoba so•ote galaha ine police-rang chanchichipenga.
“A•sel ong•chakgipa biapona sokangani ja•man police-rang nanga kamrangko matchote ia manggisiko rate nina hospital-ona watataha. Ia a•selni bidingo chinga mokordomako segate am•sandianirangko dakna a•bachengataha,” ine West Garo Hills a•jani SP parakataha.
